[శ్రీమతి గీతాంజలి రచించిన ‘ఆమె నీ ప్రేయసి కాదు!’ అనే కవితను పాఠకులకు అందిస్తున్నాము.]
మనసు ఊయల వూగింది చాలిక..
ఊయల తాళ్లను నువ్వే కత్తిరించేయి..
ఇది నీ వర్షం కాదు..
నీ ఆకాశం కాదు.
నీ తోట కాదు
ఆమె నీ ప్రేయసి కాదు.
~
వర్షించి వెళ్లిపోయావు..
వెనక్కి తిరిగి కూడా చూడవా?
కన్నీరు మున్నీరు అయ్యానో..
నదిని అయ్యానో.. వరద అయ్యానో..
సముద్రమే అయి పొంగానో
ఒక్కసారైనా చూడవా?
~
ఇక నిద్రపో..
ఎటూ తేల్చని రాత్రి ఇది
చీకటి తప్ప! ఎవరూ రాని రేయి ఇది
నీలో నువ్వు తప్ప!
అద్దంలో చూసుకో..
మరో నీకోసం..
ఇక ఏమి చేస్తావు..
నీ తల నువ్వే నిమురుకో!
~
నాకో వర్షాన్నివ్వు
లేదా నువ్వే నా వాకిలిలో
కురిసి ఖాళీ మబ్బువయిపో.
నాలోపలి వర్షానికి..
నీ జ్ఞాపకం తోడు.
ఈ బయటి వర్షానికీ
నువ్వే ఒక జ్ఞాపకం!
~
ఏమోలే..
సరేలే.,
దొరికినవే చాలు
నీతో ఈ క్షణాలు!
శ్రీమతి గీతాంజలి (డా. భారతి దేశ్పాండే) వృత్తిరీత్యా సైకోథెరపిస్ట్, మారిటల్ కౌన్సిలర్. కథా, నవలా రచయిత్రి. కవయిత్రి. అనువాదకురాలు. వ్యాస రచయిత్రి. ‘ఆమె అడవిని జయించింది’, ‘పాదముద్రలు’. లక్ష్మి (నవలిక). ‘బచ్చేదాని’ (కథా సంకలనం), ‘పహెచాన్’ (ముస్లిం స్త్రీల ప్రత్యేక కథా సంకలనం), ‘పాలమూరు వలస బతుకు చిత్రాలు’ (కథలు), ‘హస్బెండ్ స్టిచ్’ (స్త్రీల విషాద లైంగిక గాథలు) ‘అరణ్య స్వప్నం’ అనే పుస్తకాలు వెలువరించారు. ‘ఈ మోహన్రావున్నాడు చూడండీ..! (కథా సంపుటి)’ త్వరలో రానున్నది. ఫోన్: 8897791964