Site icon సంచిక – తెలుగు సాహిత్య వేదిక

ఆమె స్వగతం!

[శ్రీమతి శాంతిశ్రీ బెనర్జీ రచించిన ‘ఆమె స్వగతం!’ అనే కవితని పాఠకులకు అందిస్తున్నాము.]

నన్ను భయపెట్టదు వార్ధక్యం!
నా వయస్సు అధిరోహించే నిచ్చెన
నన్ను వేదనకు గురిచెయ్యదు
కీళ్ళనొప్పులు ముడుతలు తెల్లజుట్టు
మానసికంగా నన్ను బాధించవు
నాకు తెలుసు వయస్సంటే
మనస్సులో శరీరంలో జీవనరీతిలో
వచ్చే సహజమైన పరిణామమని!

నన్ను భయపెట్టదు ఒంటరితనం!
నా కోసం నేను సమయం సమర్పించుకునే
అమూల్య అవకాశం అది
స్నేహం కరువైన తరుణంలో
నాకు నేనే నెచ్చెలి అయినప్పుడు
ఒంటరితనం అవుతుంది నా ప్రియ బాంధవి
నా ఆలోచనల విశాల నీలాకాశంలో
స్వేచ్ఛగా విహరించే విహంగాన్ని నేను!

కానీ —–
నన్ను వెంటాడే భరమొకటుంది!
నేనెవరికీ భారం కాకూడదని
మరొకరి బాధ్యతగా మిగలకూడదని
ఊహించని బంధంగా మారకూడదని
నా బలహీనతలు ఇతరుల
త్యాగాలకు నాంది కాకూడదని
నా వలన ఇతరుల నొసటిపై
చింతల గీతలు రాకూడదని

అందుకే —-
నా వయస్సు ఇతరులకు వెలుగునిచ్చే
అనుభవాల ఖజానా కావాలి
వారి జీవితాల్లో సఫలత నింపాలి
నా జీవితమొక రాయని కవితై
ప్రతి పదం జీవించడంలోని
ఆనందాల అనుభవాల లోతులను వివరించాలి

నా ఆఖరి రోజులు —-
పొగలుగక్కే టీ కప్పుగా మారి
త్రాగే ప్రతి గుటకలో
వెచ్చదనం తియ్యదనం వొలకాలి
నాకు నేనుగా నిలవాలి
బతుకులో ప్రశాంతత నిండాలి!

(ఎస్. గుహ థాకుర్తా బెంగాలీ కవితకు ప్రభావితమై చేసిన స్వేచ్చానువాదం.)

Exit mobile version