[08 జూన్ 2024న మృతి చెందిన రామోజీరావు గారికి నివాళి అర్పిస్తున్నారు ఏ. అన్నపూర్ణ.]
మరణం తథ్యమని, ఎవరికైనా తప్పదని అందరికి తెలుసు.
జీవించినంత కాలము మనం చేసే పనులు మరణానంతరం కూడా అందరి మనసుల్లోనూ నిలిచిపోతాయి.
అలా నిలిచిపోయేలా పేరు తెచ్చుకోడం కొందరికే సాధ్యం.
అలాంటి వ్యక్తి శ్రీ చెరుకూరి రామోజీ రావుగారు!
1974లో ఉమ్మడి ఆంధ్రా – విశాఖపట్నంలో ఈనాడు వార్తా పత్రిక ప్రారంభించి కొత్త ఒరవడికి శ్రీకారం చుట్టారు రామోజీరావు.
ఈ విషయం పత్రికలు చదివేవారందరికి గుర్తే! ఆ రోజు నుంచి ఈ రోజు వరకూ అందరికి ఆత్మబంధువు ఈనాడు.
నేను రైటర్‍గా స్థిరపడటానికి ఈనాడు ముఖ్య కారణం. పత్రిక చదివి ఉత్తరాలు రాసేదాన్ని. అలా మొదలైంది ఈనాడు పత్రికలో నా ప్రస్థానం.
ఈనాడు ప్రచురణలు జంట మాసపత్రికలు చతుర విపుల చదువుతుంటే కథలు రాయాలని ఆలోచన వచ్చింది. చతుర హాస్య కథలతో మొదలై చతురలో నవల రాసేవరకూ వచ్చింది.
అంతేకాకుండా ఈనాడు ఆఫీసు మా ఇంటికి దగ్గిరే కనుక నేను నా రచనలను ఆఫీసులో ఇచ్చేదాన్ని.
ప్రతి పుస్తకం చదివే అలవాటుతో నెలకి ఆరు పత్రికలు కొనేదాన్ని.
ఆ పత్రికలు వెలువడినంత కాలమూ చదవకుండా వుండలేదు. ఆ పత్రికలు నాకు అంత చేరువ అయ్యాయి .
రామోజీరావుగారు ఎప్పుడూ కొత్తదనం కోసం ప్రయత్నం చేయడం, ఆకట్టుకునే అంశాలను జోడించడం ‘ఆదివారం అనుబంధం’ కి వన్నెతెచ్చింది. ఇప్పుడు అంటే స్మార్ట్‌ఫోను గూగుల్ సెర్చిలో క్లిక్ చేస్తున్నాము కానీ ప్రపంచం నలుమూలలా జరిగే అద్భుతాలు, ఔరా! అనిపించే అంశాలను తెలియచెప్పింది ఈనాడు పేపర్.
నేను అమెరికా వెళ్ళినపుడు ఇండియన్ గ్రోసరీ స్టోరులో ఎక్సపైర్ డేటు దాటినా ప్రియా పచ్చళ్ళు ఒకటి కొంటే రెండోది ఫ్రీ అని అమ్ముతుంటే చూసి రామోజీరావుగారికి వుత్తరం రాసాను్. వారు ఈ విషయం తన దృష్టికి తెచ్చినందుకు మెచ్చుకుని, వారి మీద చర్య తీసుకున్నారు. ఇలా శ్రద్ధ తీసుకోడం, అక్కడ స్టోర్లను పరిశీలించి తెలియచేయమని నాకు అప్పగించారు. అంతటి జాగ్రత్త తీసుకోడం నిజంగా వారికే చెల్లింది.
మా అత్తగారు మార్గదర్శిలో ఇరవై అయిదు ఏళ్ళు డబ్బు దాచుకున్నారు. ఏనాడూ తేడా రాలేదు.
ఆవిడకు బ్యాంకుల మీద లేని నమ్మకం మార్గదర్శి మీద వుంది.
హైదరాబాదులో మా ఇంటికి ఎవరు స్నేహితులు బంధువులు వచ్చినా బహుమతులు ఇవ్వలేదు. వారికి రామోజీ ఫిలిం సిటీ చూపించేదాన్ని వాళ్ళు ఎంతో సంతోషపడేవారు. ఆ ఫొటో ఆల్బమ్ ఎన్ని ఉన్నాయో లెక్కలేదు.
ఫిలిం సిటీలో తిరిగే టూరిస్ట్ బస్సులు ఎక్కడానికి చాలా ఎత్తులోవుండేవి. మోకాళ్ళ నొప్పులు వున్నవారు, వృద్ధులు ఇబ్బంది పడుతుంటే చూసి రామోజీరావుగారికి తెలియచేస్తే బదులుగా లేఖ రాసేరు – ఇకనుంచి ప్రతి బస్సులోను ఎక్కడానికి చిన్న బల్లవొకటి ఉండేలా ఏర్పాటు చేస్తాను అని!
ఇక టీవీ ఛానల్స్ అంటే వీక్షకులలో వుండే ఆదరణ చెప్పలేనిది. ప్రేక్షకుల అభిరుచి మేరకు ఇష్టమైన ఛానల్ చూసేలా ఎన్నో చానళ్లను అందుబాటులోకి తెచ్చారు. వారి తర్వాత మిగిలినవారు కూడా ప్రారంభించారు కాని మొదటి స్థానం రామోజీ గారిదే! ముఖ్యంగా గృహిణులు జీవితంలో ఒక భాగంగా ప్రియా తినుబండారాలు పచ్చళ్ళు లాంటి ఉత్పత్తులు ఎంటర్టైన్మెంట్ చానల్స్ మారిపోయాయి. ఇలా అన్ని రంగాలలోను పేరును సార్థకం చేసుకోడంతో తెలుగు రాష్ట్రాలలో రామోజీరావుగారి పేరు చిరస్థాయిగా నిలిచింది.
నాకు ఊహ తెలిసాక జనరల్ నాలెడ్జ్ పట్ల ఇష్టం ఉండేది. అది చాలావరకూ ఈనాడు వార్తా పత్రిక ద్వారానే నెరవేరింది. అలాగే సాహిత్యము కూడా ఇష్టం. రచనలు చేయడం.. ఇది కూడా ఈనాడు ద్వారా నెరవేరడం ఆ పత్రిక నన్ను గుర్తించడం నాకు గిఫ్ట్!
ప్రతిధ్వని కార్యక్రమంలోనూ నాకు అవకాశం ఇవ్వడం మరువలేని అనుభూతి. ఇలా చెప్పాలి అంటే ఎన్నో.
వారు ఎందరికో ఉపాధి కల్పించిన పుణ్యమూర్తి.. మరి ఎందరికో మార్గదర్శి.
పట్టుదల, సాధించాలి అనే ధ్యేయం అంటూ ఉండేవారికి శ్రీ రామోజీరావుగారు ఒక రోల్ మోడల్.
వారికి నా నివాళి.
ఏ. అన్నపూర్ణగారిది కాకినాడ. వారి నాన్నగారు పిఠాపురం రాజావారి కాలేజీలో ఇంగ్లీషు లెక్చరర్‌గా పని చేశారు. ఇంట్లో చాలా అమూల్య గ్రంథాలూ నవలలు, మాసపత్రికలు, ఎన్నో పుస్తకాలు ఉండడం వలన చిన్నప్పటి నుంచే బాగా చదవడం అలవాటైంది. బాల సాహిత్యంతో పాటు ఇతర పుస్తకాలు చదివేవారు. ఆ తరువాత చదువు, పెళ్లి పిల్లలు జీవితంలో అందరిలాగే పరిణామాలు జరిగినా ఏనాడూ చదవడం మానలేదు. పిల్లలు బాగా చదువుకుని మెరిట్లో అమెరికా వెళ్ళాక తీరిక లభించి రచనలు చేయాలనే ఆలోచన వచ్చింది.
రంగనాయకమ్మ, వై.సులోచన రాణి, యండమూరి, మల్లాది అభిమాన రచయితలు. వారి ప్రభావమో ఉత్తరాలు రాసే అలవాటూ కలసి వారిని రచయిత్రిని చేశాయి. వారి మొదటి కథ ‘రచన మాసపత్రిక’లో వచ్చింది. మొదటి నవల ‘చతుర’లో ప్రచురితమయింది. వీరి రచనలను ఎక్కువగా – రచన, చతుర ప్రచురించాయి. ఏభై కథలు. మూడు చతుర నవలలు, ఇరవై అయిదు కవితలు వ్రాశారు. విపుల కథలు రెండు కన్నడంలో అనువదించారు. ఇంకా ఇతర పత్రికలు, వెబ్ మ్యాగజైన్‌లలోను ప్రచురితమయ్యాయి.
మాజీ ఐఏఎస్ ఆపీసర్ డాక్టర్.జయప్రకాశ్ నారాయణగారు తొంభై ఏడులో హైదరాబాదులో స్థాపించిన ‘ఉద్యమ సంస్థ’లో ఇరవై నాలుగేళ్లుగా కార్యకర్తగాను; సంస్థ మాసపత్రికలో వ్యాసాలు రాసే రచయిత్రిగా గుర్తిపు రావడం వారికి సంతృప్తినిచ్చింది! అటువంటి అత్యుత్తమైన గొప్ప అధికారితో పనిచేసే అవకాశం రావడం అన్నపూర్ణ గౌరవప్రదంగా భావిస్తారు. దేవరకొండ బాలగంగాధర్ తిలక్ గారి భార్య ఇందిర అన్నపూర్ణగారికి మేనత్తగారే!
ఇప్పుడు గత ఆరు సంవత్సరాలుగా అమెరికాలోని కాలిఫోర్నియాలో స్థిరపడ్డారు. చదవడం రాయడంతో కాలం ఆనందంగా గడిచిపోతోంది. వారి భర్త మేథ్స్ ప్రొఫెసర్‍గా హైదరాబాదులో పనిచేశారు.