[శ్రీ విడదల సాంబశివరావు రచించిన ‘అక్షరాల కుప్పలు!’ అనే కవితని పాఠకులకు అందిస్తున్నాము.]
సామాజిక స్పృహ లేని
సభ్యసమాజం వైఖరిపై
కత్తులు దూస్తోన్న అక్షరాలు!
ప్రేమ భావనకు తిలోదకాలిచ్చి
కుటుంబ బంధాలను తుంగలో తొక్కి
అనుబంధాలను ఆపహాస్యం చేస్తోన్న
ఆధునిక జీవనయానంపై
కొరడా ఝళిపిస్తోన్న అక్షరాలు!
పేగుబంధాలను వృద్ధాశ్రమాలకు తరలిస్తోన్న
రక్త సంబంధాల వారసత్వంపై
యుద్ధం ప్రకటించిన అక్షరాలు!
ప్రజాపాలన ముసుగులో నియంతృత్వం!
న్యాయం కోసం ఎదురు తిరిగిపోరాడితే..
కత్తుల బోనులో కఠిన కారాగార శిక్షలు!!
బంధుప్రీతి.. ఆశ్రిత పక్షపాతం..
పాలకుల పారదర్శకతను ప్రశ్నిస్తున్న వేళ
నా కలంలోని అక్షరాలు
అడుగడుగునా అవినీతిని ఎండగడుతున్నాయి!
నైతిక విలువలు అడుగంటిపోయిన వ్యవస్థలో
పసిబిడ్డలపై పైశాచిక దాడుల క్రీడలు..!
చిన్నారుల హృదయ వేదనను..
పసిమనసుల గాయాల మౌన రోదనను..
విశ్వవ్యాపితం చేసిన అక్షరాలు,
నా దేశం నలు చెరగులా
మతాల మత్తులో తూలుతోన్న
మానవమృగాల సమూహాలు
కత్తులతో కుత్తుకలు కోసుకుంటూ
జాతి చరిత్రను సరికొత్తగా
లిఖిస్తోన్న వైనాన్ని..
నా మనోనేత్రం అక్షరబద్ధం చేస్తోంది!
ప్రపంచ పటంలో
నా దేశం ముఖచిత్రాన్ని
మహోన్నతంగా లిఖించాలని
కలలు గంటోన్న..
నా మదిలోని గదులన్నీ..
అక్షరాలతో కుప్పలతో..
నిండిపోయాయి నిస్సహాయంగా..!!
శ్రీ విడదల సాంబశివరావు గారు 22 జనవరి 1952 న గుంటూరు జిల్లా, చిలకలూరిపేట పురపాలక సంఘం పరిధిలో ఉన్న పురుషోత్తమపట్నం గ్రామంలో ఓ మధ్య తరగతి ‘రైతు’ కుటుంబంలో జన్మించారు. శ్రీమతి సీతమ్మ, రాములు వీరి తల్లిదండ్రులు. స్వగ్రామంలో ప్రాథమిక విద్య, చిలకలూరిపేటలో ప్రాథమికోన్నత విద్య, తెనాలిలో బి.ఎస్.సి. పూర్తి చేశారు.
బాల్యం నుంచి నటనపై అభిరుచి ఉంది. అనేక నాటికలలోనూ, నాటకాలలోనూ నటించి ప్రశంసలందుకొన్నారు. వివిధ సంస్థల నుండి పతకాలు పొందారు. రాష్ట్రస్థాయిలో ఉత్తమ నటుడిగా బహుమతులు పొందారు. వీరు రచించిన ‘పుణ్యభూమి నా దేశం’ (నాటకం), ‘తలారి తీర్పు’ (నాటిక) ప్రసిద్ధమయ్యాయి. టివి ధారావాహికల్లోనూ, కొన్ని సినిమాల్లోనూ ముఖ్య పాత్రలు పోషించారు.
సాంబశివరావు గారు వెయ్యికి పైగా కవితలు రాశారు. వాస్తవిక జీవితాలని చిత్రిస్తూ అనేక కథలు రాశారు. కవితలు, నాటకాలు, కథలు కలిపి 14 పుస్తకాలు ప్రచురించారు. పలు పత్రికలలో ఫీచర్లు నిర్వహిస్తున్నారు.
నాటకరంగలోనూ, రచన రంగంలోనూ ఉత్తమ పురస్కారాలు అందుకొన్నారు. నీహారిక పౌండేషన్ అనే సంస్థని స్థాపించి సమాజ సేవ చేస్తున్నారు.