[కేంద్ర సాహిత్య అకాడమీ అనువాద పురస్కార గ్రహీత శ్రీ ఎలనాగ సంచిక పాఠకుల కోసం ప్రత్యేకంగా జాతీయ, అంతర్జాతీయ కవితలని అనువదించి ‘అనువాద మధు బిందువులు’ పేరిట అందిస్తున్నారు.]
సాంచిపట్ చిత్తరువు
~
గడియారాలు కరుగుతున్న వేళ
నా కళ్లను డాలీ కళ్లతో మార్పిడి చేసుకున్నాను
ఒకటి, రెండు, మరెన్నో గడియారాలు..
అవన్నీ కరిగిపోవడం ప్రారంభించినై
కరిగిన మైనంలా
ఆ గడియారాల్లోని సమయాలు
కారిపోతున్నై
రాజుల, రాణుల చిత్రపటాల మీద
బానిసల చేతుల మీద
విశ్వాసపాత్రులైన భార్యల తలల మీద
వేశ్యల మీద, హంతకుల మీద
భూస్వాముల మీద, శ్రామికుల మీద
సమయాలు కారి జారి పడిపోతున్నై
నగరం, అశ్వికదళం, యువకులు
వెనక్కి పరుగెత్తుతున్నారు
ఇప్పుడే తిరగేశాను
ఒక సాంచిపట్ పత్రాన్ని.
గడిచిన కాలపు ఇతివృత్తాన్ని
ఒక కొత్త ఆకు మీద
ఒడుపుతో కలగా చిత్రించవచ్చు
కొత్తకల కోసం
ఒక కల..
అస్సామీ మూలం, ఆంగ్లానువాదం: సత్యకామ్ బోర్తాకర్
తెలుగు అనువాదం: ఎలనాగ
(సాంచిపట్: సాంచి అనే చెట్టు బెరడు. దీనితో అస్సాం, పరిసర ప్రాంతాలలో తాళపత్రాల వంటి పుటలను తయారు చేస్తారు.)
వృత్తిరీత్యా వైద్యులైన శ్రీ ఎలనాగ (డాక్టర్ నాగరాజు సురేంద్ర) ప్రవృత్తి రీత్యా సాహితీవేత్త. కవిగా, భాషావేత్తగా, విమర్శకుడిగా, అనువాదకుడిగా సుప్రసిద్ధులు.
కేంద్ర సాహిత్య అకాడమీ అనువాద పురస్కార గ్రహీత. తెలుగులోనూ, ఆంగ్లంలోనూ రచనలు చేసే ఎలనాగ గారు సుమారు 40 గ్రంథాలు వెలువరించారు.
‘ఫేడెడ్ లీవ్స్ అండ్ ఫ్లైస్’, ‘ఇంప్రెషన్-ఇమేజెస్’, ‘మెమొరబుల్ మెలోడీ మేకర్స్ అండ్ అదర్ పోయెమ్స్ ఆన్ మ్యూజిక్’ మొదలైనవి ఆయన తెలుగు నుండి ఆంగ్లంలోకి తెచ్చిన కవితా సంపుటాలు.
వట్టికోట ఆళ్వార్ స్వామి, దాశరథి కృష్ణమాచార్య, కాళోజీ నారాయణరావు వంటి సుప్రసిద్ధ తెలుగు రచయితల కథలను, నవలలను ఆయన ఆంగ్లంలోకి తీసుకువచ్చారు. వివిధ దేశాల సాహిత్యాన్ని కూడా ఆయన తెలుగు పాఠకులకు అందించారు. వాటిలో ఉత్తమ లాటిన్ అమెరికన్ కథలు, ఉత్తమ ఆఫ్రికన్ కథలు, సోమర్సెట్ మామ్ కథలు ఉన్నాయి.
వివిధ దేశాల కథల అనువాద గ్రంథం ‘కథాతోరణం’ వెలువరించారు. పవన్ కె. వర్మ రాసిన ‘గాలిబ్: దమ్యాన్, ద టైమ్స్’ గ్రంథాన్ని ‘గాలిబ్ నాటి కాలం’ అనే పేరుతో తెలుగులోకి తెచ్చారు.