[కేంద్ర సాహిత్య అకాడమీ అనువాద పురస్కార గ్రహీత శ్రీ ఎలనాగ సంచిక పాఠకుల కోసం ప్రత్యేకంగా జాతీయ, అంతర్జాతీయ కవితలని అనువదించి ‘అనువాద మధు బిందువులు’ పేరిట అందిస్తున్నారు.]
ప్రియమైన అమాయకుడా
~
నాలోని ఖాళీ అడుగున
పాలు కోలా బీరు మొదలైన ఎన్నో
ప్రకృతుల ద్రవాలు నిండిన సరస్సు ఉంది
రాత్రివేళ
ద్రవీకృత స్వభావాలు
నెలకొని ఉంటాయి అందులో.
తూములన్నీ వర్షపు నీళ్ల ప్రవాహాలతో
ముంచెత్తబడి ఉంటాయి
నా ఖాళీలో ఒక కాలువ ఉంటుంది
స్వభావాలు తూముల్లోంచి
ఉధృతంగా వెలువడుతుంటాయి –
విడతలు విడతలుగా కడిగేస్తూ.
నా ఖాళీలో ఒక చేప ఉంది
సముద్రంలో నాచు లాగా.
అదొక తేలే తెప్ప,
గండశిలల మధ్య ఇరుకు గండి
రాత్రంతా స్వభావాలన్నీ
నదీ సముద్ర సంగమ స్థలిలో
పదే పదే ముక్కలౌతుంటాయి
ఆ రాత్రిముంపు నుండి
నల్లగా మెరిసే జలాల నుండి
తప్పించుకోలేవు నువ్వు
నా ఖాళీకి సరిహద్దుగా ఎక్కడా
ఎత్తైన కొండల అడ్డువరుస లేదు
రాత్రిపూట అదొక ద్వీపం
ముంపుజలాలు వేగంగా
ఎకాయెకిన వచ్చి ముంచేస్తాయి
అవి ఒక్కసారిగా
స్వభావాలను కడిగేస్తాయి
ఆంగ్లమూలం: డెబోరా లాండా
తెలుగు అనువాదం: ఎలనాగ
వృత్తిరీత్యా వైద్యులైన శ్రీ ఎలనాగ (డాక్టర్ నాగరాజు సురేంద్ర) ప్రవృత్తి రీత్యా సాహితీవేత్త. కవిగా, భాషావేత్తగా, విమర్శకుడిగా, అనువాదకుడిగా సుప్రసిద్ధులు.
కేంద్ర సాహిత్య అకాడమీ అనువాద పురస్కార గ్రహీత. తెలుగులోనూ, ఆంగ్లంలోనూ రచనలు చేసే ఎలనాగ గారు సుమారు 40 గ్రంథాలు వెలువరించారు.
‘ఫేడెడ్ లీవ్స్ అండ్ ఫ్లైస్’, ‘ఇంప్రెషన్-ఇమేజెస్’, ‘మెమొరబుల్ మెలోడీ మేకర్స్ అండ్ అదర్ పోయెమ్స్ ఆన్ మ్యూజిక్’ మొదలైనవి ఆయన తెలుగు నుండి ఆంగ్లంలోకి తెచ్చిన కవితా సంపుటాలు.
వట్టికోట ఆళ్వార్ స్వామి, దాశరథి కృష్ణమాచార్య, కాళోజీ నారాయణరావు వంటి సుప్రసిద్ధ తెలుగు రచయితల కథలను, నవలలను ఆయన ఆంగ్లంలోకి తీసుకువచ్చారు. వివిధ దేశాల సాహిత్యాన్ని కూడా ఆయన తెలుగు పాఠకులకు అందించారు. వాటిలో ఉత్తమ లాటిన్ అమెరికన్ కథలు, ఉత్తమ ఆఫ్రికన్ కథలు, సోమర్సెట్ మామ్ కథలు ఉన్నాయి.
వివిధ దేశాల కథల అనువాద గ్రంథం ‘కథాతోరణం’ వెలువరించారు. పవన్ కె. వర్మ రాసిన ‘గాలిబ్: దమ్యాన్, ద టైమ్స్’ గ్రంథాన్ని ‘గాలిబ్ నాటి కాలం’ అనే పేరుతో తెలుగులోకి తెచ్చారు.