[కేంద్ర సాహిత్య అకాడమీ అనువాద పురస్కార గ్రహీత శ్రీ ఎలనాగ సంచిక పాఠకుల కోసం ప్రత్యేకంగా జాతీయ, అంతర్జాతీయ కవితలని అనువదించి ‘అనువాద మధు బిందువులు’ పేరిట అందిస్తున్నారు.]
ప్రతిధ్వని
~
పొడవైన వరండాలో
అన్ని తలుపులూ మూసి ఉన్నాయి
ప్రతి తలుపుగొళ్లాన్ని తట్టి
నా రూపం పెద్దదవడం చూసుకున్నాను
నన్ను ఒక గదిలోకి అనుమతించినప్పుడు
పడక అంచు మీద కూర్చున్నాను
సొంత మంచం మీద పడుకోలేదు
చెప్పులలో చేతులు పెట్టి
అంబాడుతూ చుట్టూ తిరిగాను
అసూయ నిండిన అమ్మ సృష్టించిన
అబ్బాయిగా మారాను
‘నీ బాధకన్న నా బాధ పెద్దది’
అని ఆమె అన్నప్పుడు
‘ఔను నీ బాధే’ అన్నాను
నేను దేన్నైనా సృష్టించాలనే ఊహ
నాకు భరింపరానిదైంది
కానీ రహస్యంగా అంగీకరించాను దాన్ని
ప్రతిధ్వనించడమంటే
మారుమ్రోగడం కాదు, తగ్గిపోవడం
హేమంత శిశిరాలు ముగిసి
వసంతం వచ్చినప్పుడు నేను లేను
కానీ అందరూ పరిమాణంలో
నాకన్న పెద్దవారయ్యారు
ఆంగ్లమూలం: కాలీ సిస్కెల్
అనువాదం: ఎలనాగ
వృత్తిరీత్యా వైద్యులైన శ్రీ ఎలనాగ (డాక్టర్ నాగరాజు సురేంద్ర) ప్రవృత్తి రీత్యా సాహితీవేత్త. కవిగా, భాషావేత్తగా, విమర్శకుడిగా, అనువాదకుడిగా సుప్రసిద్ధులు.
కేంద్ర సాహిత్య అకాడమీ అనువాద పురస్కార గ్రహీత. తెలుగులోనూ, ఆంగ్లంలోనూ రచనలు చేసే ఎలనాగ గారు సుమారు 40 గ్రంథాలు వెలువరించారు.
‘ఫేడెడ్ లీవ్స్ అండ్ ఫ్లైస్’, ‘ఇంప్రెషన్-ఇమేజెస్’, ‘మెమొరబుల్ మెలోడీ మేకర్స్ అండ్ అదర్ పోయెమ్స్ ఆన్ మ్యూజిక్’ మొదలైనవి ఆయన తెలుగు నుండి ఆంగ్లంలోకి తెచ్చిన కవితా సంపుటాలు.
వట్టికోట ఆళ్వార్ స్వామి, దాశరథి కృష్ణమాచార్య, కాళోజీ నారాయణరావు వంటి సుప్రసిద్ధ తెలుగు రచయితల కథలను, నవలలను ఆయన ఆంగ్లంలోకి తీసుకువచ్చారు. వివిధ దేశాల సాహిత్యాన్ని కూడా ఆయన తెలుగు పాఠకులకు అందించారు. వాటిలో ఉత్తమ లాటిన్ అమెరికన్ కథలు, ఉత్తమ ఆఫ్రికన్ కథలు, సోమర్సెట్ మామ్ కథలు ఉన్నాయి.
వివిధ దేశాల కథల అనువాద గ్రంథం ‘కథాతోరణం’ వెలువరించారు. పవన్ కె. వర్మ రాసిన ‘గాలిబ్: దమ్యాన్, ద టైమ్స్’ గ్రంథాన్ని ‘గాలిబ్ నాటి కాలం’ అనే పేరుతో తెలుగులోకి తెచ్చారు.