[కేంద్ర సాహిత్య అకాడమీ అనువాద పురస్కార గ్రహీత శ్రీ ఎలనాగ సంచిక పాఠకుల కోసం ప్రత్యేకంగా జాతీయ, అంతర్జాతీయ కవితలని అనువదించి ‘అనువాద మధు బిందువులు’ పేరిట అందిస్తున్నారు.]
కార్లోస్ విలియమ్స్ కార్లోస్ కవితలు మూడు
~
1) ఊరికే చెప్తున్నాను
~
నువ్వు ఫ్రిజ్ లో ఉంచిన రేగుపళ్లను తిన్నాను
ఉదయపు ఉపాహారం కోసం
వాటిని దాచుకున్నావు బహుశా.
క్షమించు
అవి చాలా తియ్యగా,
చల్లగా, ఎంతో రుచికరంగా ఉండినై
2) గోడల మధ్య
~
ఆస్పత్రి వెనుకభాగంలో
ఏమీ మొలకెత్తదు
అక్కడ ఉన్న బూడిదలో
ఆకుపచ్చ గాజుసీసా ముక్కలు
అందంగా మెరుస్తున్నై
3) అద్భుతమైన అంకె దృశ్యం
~
వర్షమూ వెలుతురూ నిండిన రాత్రిలో
ఎర్రరంగు ఫైరింజన్ ట్రక్కు మీద
బంగారు రంగులో ఐదు అంకె!
ఆ ట్రక్కు గంటల శబ్దంతో సైరన్ మోతలతో,
చక్రాలు రొద పెడుతంటే
చీకటి నిండిన నగరాన్ని దాటింది
ఆంగ్లమూలం: కార్లోస్ విలియమ్స్
తెలుగు అనువాదం: ఎలనాగ
వృత్తిరీత్యా వైద్యులైన శ్రీ ఎలనాగ (డాక్టర్ నాగరాజు సురేంద్ర) ప్రవృత్తి రీత్యా సాహితీవేత్త. కవిగా, భాషావేత్తగా, విమర్శకుడిగా, అనువాదకుడిగా సుప్రసిద్ధులు.
కేంద్ర సాహిత్య అకాడమీ అనువాద పురస్కార గ్రహీత. తెలుగులోనూ, ఆంగ్లంలోనూ రచనలు చేసే ఎలనాగ గారు సుమారు 40 గ్రంథాలు వెలువరించారు.
‘ఫేడెడ్ లీవ్స్ అండ్ ఫ్లైస్’, ‘ఇంప్రెషన్-ఇమేజెస్’, ‘మెమొరబుల్ మెలోడీ మేకర్స్ అండ్ అదర్ పోయెమ్స్ ఆన్ మ్యూజిక్’ మొదలైనవి ఆయన తెలుగు నుండి ఆంగ్లంలోకి తెచ్చిన కవితా సంపుటాలు.
వట్టికోట ఆళ్వార్ స్వామి, దాశరథి కృష్ణమాచార్య, కాళోజీ నారాయణరావు వంటి సుప్రసిద్ధ తెలుగు రచయితల కథలను, నవలలను ఆయన ఆంగ్లంలోకి తీసుకువచ్చారు. వివిధ దేశాల సాహిత్యాన్ని కూడా ఆయన తెలుగు పాఠకులకు అందించారు. వాటిలో ఉత్తమ లాటిన్ అమెరికన్ కథలు, ఉత్తమ ఆఫ్రికన్ కథలు, సోమర్సెట్ మామ్ కథలు ఉన్నాయి.
వివిధ దేశాల కథల అనువాద గ్రంథం ‘కథాతోరణం’ వెలువరించారు. పవన్ కె. వర్మ రాసిన ‘గాలిబ్: దమ్యాన్, ద టైమ్స్’ గ్రంథాన్ని ‘గాలిబ్ నాటి కాలం’ అనే పేరుతో తెలుగులోకి తెచ్చారు.