[కేంద్ర సాహిత్య అకాడమీ అనువాద పురస్కార గ్రహీత శ్రీ ఎలనాగ సంచిక పాఠకుల కోసం ప్రత్యేకంగా జాతీయ, అంతర్జాతీయ కవితలని అనువదించి ‘అనువాద మధు బిందువులు’ పేరిట అందిస్తున్నారు.]
జూన్ నెలలో బంతిపూలు
~
జీవితమా!
నా కలల మీద సుతారంగా నడువు
తేలియాడే మబ్బుల నీడల్లో కూర్చుని
లయాన్వితంగా ప్రవహించే నదుల
గుసగుసలను వింటూ
నేనిక్కడే ఉండిపోతాను
పరిచిత, అపరిచిత ప్రాంతాలనుండి
కంఠస్వరాలు గాలిలో తేలివచ్చి
నా గుండెలో ఆటలాడుతాయి
నిట్టూర్పుల, మూలుగుల, అరుపుల
ప్రేమనూ, పోగొట్టుకున్నతనాన్నీ
మోసుకుంటూ వచ్చే గీతాలు కూడా..
నేను కాలపు లోతుల్లోకి చూపును సారిస్తాను
డిసెంబర్ లో గులాబీలనూ, జూన్ లో బంతిపూలనూ
తెచ్చే విలువైన క్షణాలను వెతుకుతాను
నింగిరంగును నింపుకుంటాను హృదయంలో.
ఆ క్షణాలు ఆనందంతో నా కళ్లముందు
స్వేచ్ఛగా నాట్యం చేస్తాయి
నా ఊరి చెరువునూ అందులో ఈదే చంద్రుడినీ
మళ్లీ చూడాలనుకుంటాను
దుమ్ము నిండిన తోవనూ దానిమీద
మెల్లగా సాగే ఎద్దులబండినీ కూడా.
నా తోటలోని తాటిచెట్లు
వెన్నెలలో మౌనంగా అనుసరిస్తాయి దాన్ని
పరిణత కాంక్షల రూపం దాల్చే
ఏకాంతపు పరిమళాన్ని పీల్చాలనుకుంటాను
విజయ గీతాన్ని ఆలపించే
నా గుండెచప్పుళ్లను వినేందుకు
కళ్లు మూసుకోవాలనుకుంటాను
జీవితమా!
వేగంగా సాగే వాహనంలో వెళ్లు నువ్వు
నేను నీకు వీడ్కోలు పలుకుతాను
నా కలల నీడలు పరుచుకున్న
తోవను చూస్తూ కూర్చుంటానిక్కడ
కనపడని దేవకన్యలు
కదలాడే సంగీతానికి అనుగుణంగా
నాట్యం చేస్తుంటే చూస్తుంటాను
నా పాత ప్రేమికులు
నా దగ్గరికి తిరిగి వస్తారు
ఆంగ్లమూలం: మృత్యుంజయ్ సారంగి
అనువాదం: ఎలనాగ
వృత్తిరీత్యా వైద్యులైన శ్రీ ఎలనాగ (డాక్టర్ నాగరాజు సురేంద్ర) ప్రవృత్తి రీత్యా సాహితీవేత్త. కవిగా, భాషావేత్తగా, విమర్శకుడిగా, అనువాదకుడిగా సుప్రసిద్ధులు.
కేంద్ర సాహిత్య అకాడమీ అనువాద పురస్కార గ్రహీత. తెలుగులోనూ, ఆంగ్లంలోనూ రచనలు చేసే ఎలనాగ గారు సుమారు 40 గ్రంథాలు వెలువరించారు.
‘ఫేడెడ్ లీవ్స్ అండ్ ఫ్లైస్’, ‘ఇంప్రెషన్-ఇమేజెస్’, ‘మెమొరబుల్ మెలోడీ మేకర్స్ అండ్ అదర్ పోయెమ్స్ ఆన్ మ్యూజిక్’ మొదలైనవి ఆయన తెలుగు నుండి ఆంగ్లంలోకి తెచ్చిన కవితా సంపుటాలు.
వట్టికోట ఆళ్వార్ స్వామి, దాశరథి కృష్ణమాచార్య, కాళోజీ నారాయణరావు వంటి సుప్రసిద్ధ తెలుగు రచయితల కథలను, నవలలను ఆయన ఆంగ్లంలోకి తీసుకువచ్చారు. వివిధ దేశాల సాహిత్యాన్ని కూడా ఆయన తెలుగు పాఠకులకు అందించారు. వాటిలో ఉత్తమ లాటిన్ అమెరికన్ కథలు, ఉత్తమ ఆఫ్రికన్ కథలు, సోమర్సెట్ మామ్ కథలు ఉన్నాయి.
వివిధ దేశాల కథల అనువాద గ్రంథం ‘కథాతోరణం’ వెలువరించారు. పవన్ కె. వర్మ రాసిన ‘గాలిబ్: దమ్యాన్, ద టైమ్స్’ గ్రంథాన్ని ‘గాలిబ్ నాటి కాలం’ అనే పేరుతో తెలుగులోకి తెచ్చారు.