[కేంద్ర సాహిత్య అకాడమీ అనువాద పురస్కార గ్రహీత శ్రీ ఎలనాగ సంచిక పాఠకుల కోసం ప్రత్యేకంగా జాతీయ, అంతర్జాతీయ కవితలని అనువదించి ‘అనువాద మధు బిందువులు’ పేరిట అందిస్తున్నారు.]
జాగరూకత గురించి
~
ఇల్లొక ధ్వని
దాన్ని నేను పడమటి పర్వతశ్రేణి లోని
మెడో లార్క్ పక్షి కూతలో,
నేను కారులో పోయే రహదారిలో
సహజంగా వెలసిన గండశిలల్లో,
మా అమ్మ మాట్లాడే భాషలో,
అందులోని యాసలో వినగలను
అది ఆమె సాగదీసే అచ్చులలో,
కలిపి చితక్కొట్టిన పదాలలో,
ఒత్తి పలికే ‘ర్స్’ లలో, ‘రెజ్’ లలో
ఒదిగిపోయి ఉంటుంది
ఈ ‘రెజ్’ యాసను వింటూ పెరిగాను నేను
కానీ అది ఆమె మాటల్లో ఉంటుందని
ఎప్పుడు గ్రహించానంటే,
వేడిమీ ఉక్కపోతా నిండిన దక్షిణ ప్రాంతంలో
ఒక ఏడాది పాటు గడిపి వచ్చింతర్వాత.
అమ్మ కంఠస్వరంలో వ్యోమింగ్ సరస్సునూ
మొగ్గ తొడుగుతున్న రష్యన్ ఆలివ్ చెట్టునూ
ఆఘ్రాణించగలను నేను
నదులలో జడలు కట్టిన నాచు
నా చేతుల్లో కరిగిపోయే అనుభవం అది
మా అమ్మబొమ్మ పాతబడిపోయింది
అమెరికన్ కాలనీల్లోని నా స్నేహితులందరూ
అదే అంటారు
‘మేవరిక్ – 99 సెంట్’ పానీయపు రిఫిల్స్ ను
మనం ఇప్పటికీ రుచి చూడగలం
కీర్తిశేషుడైన నా తాత
ఆ రిఫిల్స్ ను దొంగిలించేవాడు – వాటిని దాచిన స్థలం లోంచి.
ఎండిపోతున్న నదిలో భాగమైన ఈత కొలనులో,
చిరుపాల మొక్కల పసరులో దాన్ని రుచి చూడగలం
తీసేసిన ప్లగ్ పిన్నుల కాలిన ఇత్తడి లాగా,
విడిపోయిన కొన్నింటిలో అవశేషాలుంటాయి
ఆంగ్లమూలం: కూక్సీ బ్లాక్
అనువాదం: ఎలనాగ
వృత్తిరీత్యా వైద్యులైన శ్రీ ఎలనాగ (డాక్టర్ నాగరాజు సురేంద్ర) ప్రవృత్తి రీత్యా సాహితీవేత్త. కవిగా, భాషావేత్తగా, విమర్శకుడిగా, అనువాదకుడిగా సుప్రసిద్ధులు.
కేంద్ర సాహిత్య అకాడమీ అనువాద పురస్కార గ్రహీత. తెలుగులోనూ, ఆంగ్లంలోనూ రచనలు చేసే ఎలనాగ గారు సుమారు 40 గ్రంథాలు వెలువరించారు.
‘ఫేడెడ్ లీవ్స్ అండ్ ఫ్లైస్’, ‘ఇంప్రెషన్-ఇమేజెస్’, ‘మెమొరబుల్ మెలోడీ మేకర్స్ అండ్ అదర్ పోయెమ్స్ ఆన్ మ్యూజిక్’ మొదలైనవి ఆయన తెలుగు నుండి ఆంగ్లంలోకి తెచ్చిన కవితా సంపుటాలు.
వట్టికోట ఆళ్వార్ స్వామి, దాశరథి కృష్ణమాచార్య, కాళోజీ నారాయణరావు వంటి సుప్రసిద్ధ తెలుగు రచయితల కథలను, నవలలను ఆయన ఆంగ్లంలోకి తీసుకువచ్చారు. వివిధ దేశాల సాహిత్యాన్ని కూడా ఆయన తెలుగు పాఠకులకు అందించారు. వాటిలో ఉత్తమ లాటిన్ అమెరికన్ కథలు, ఉత్తమ ఆఫ్రికన్ కథలు, సోమర్సెట్ మామ్ కథలు ఉన్నాయి.
వివిధ దేశాల కథల అనువాద గ్రంథం ‘కథాతోరణం’ వెలువరించారు. పవన్ కె. వర్మ రాసిన ‘గాలిబ్: దమ్యాన్, ద టైమ్స్’ గ్రంథాన్ని ‘గాలిబ్ నాటి కాలం’ అనే పేరుతో తెలుగులోకి తెచ్చారు.