[కేంద్ర సాహిత్య అకాడమీ అనువాద పురస్కార గ్రహీత శ్రీ ఎలనాగ సంచిక పాఠకుల కోసం ప్రత్యేకంగా జాతీయ, అంతర్జాతీయ కవితలని అనువదించి ‘అనువాద మధు బిందువులు’ పేరిట అందిస్తున్నారు.]
కవి వేషంలో చార్లీ చాప్లిన్
~
జరగబోయే విపత్తు కోసం
సిద్ధంగా వుంది వేదిక
దేశద్రిమ్మరి అయిన బికారి బుడతడొకడు
మైక్ ను చేరుకునేందుకు
పుస్తకాల దొంతర మీద నిలబడ్డాడు
వాడి పాదాల దగ్గర తివాచీ మీద
తాళ్లతో కట్టేసిన ఒక అసలైన కవి
తనలో తాను గొణుక్కుంటున్నాడు
బుడతడు నోరు తెరిచాడు
హా, భళా, లలలా!
నోట్లోంచి పావురాలు, విద్యుత్ బల్బులు,
ప్లాస్టిక్ గులాబీలు వచ్చాయి బయటికి!
అంతే..
‘కవులను మళ్లీ కలిసేది లేదు’ అంటూ
గింజుకున్నాడు ‘షో’ ను నిర్వహించే
యువ ప్రొఫెసర్
నేలమీది రహస్య ద్వారం కోసం
ఆర్తనాదం చేశాడు విభాగ అధిపతి
అది తెరుచుకుంది
ఏమీ జరగనట్టు బుడతడు
తన పనిని కొనసాగిస్తున్నాడు
అడ్డు లేని అతని బాహువు
అనుకరిస్తోంది పక్షిరెక్కను.
ఆంగ్లమూలం: కార్నీలియస్ ఈడీ
అనువాదం: ఎలనాగ
వృత్తిరీత్యా వైద్యులైన శ్రీ ఎలనాగ (డాక్టర్ నాగరాజు సురేంద్ర) ప్రవృత్తి రీత్యా సాహితీవేత్త. కవిగా, భాషావేత్తగా, విమర్శకుడిగా, అనువాదకుడిగా సుప్రసిద్ధులు.
కేంద్ర సాహిత్య అకాడమీ అనువాద పురస్కార గ్రహీత. తెలుగులోనూ, ఆంగ్లంలోనూ రచనలు చేసే ఎలనాగ గారు సుమారు 40 గ్రంథాలు వెలువరించారు.
‘ఫేడెడ్ లీవ్స్ అండ్ ఫ్లైస్’, ‘ఇంప్రెషన్-ఇమేజెస్’, ‘మెమొరబుల్ మెలోడీ మేకర్స్ అండ్ అదర్ పోయెమ్స్ ఆన్ మ్యూజిక్’ మొదలైనవి ఆయన తెలుగు నుండి ఆంగ్లంలోకి తెచ్చిన కవితా సంపుటాలు.
వట్టికోట ఆళ్వార్ స్వామి, దాశరథి కృష్ణమాచార్య, కాళోజీ నారాయణరావు వంటి సుప్రసిద్ధ తెలుగు రచయితల కథలను, నవలలను ఆయన ఆంగ్లంలోకి తీసుకువచ్చారు. వివిధ దేశాల సాహిత్యాన్ని కూడా ఆయన తెలుగు పాఠకులకు అందించారు. వాటిలో ఉత్తమ లాటిన్ అమెరికన్ కథలు, ఉత్తమ ఆఫ్రికన్ కథలు, సోమర్సెట్ మామ్ కథలు ఉన్నాయి.
వివిధ దేశాల కథల అనువాద గ్రంథం ‘కథాతోరణం’ వెలువరించారు. పవన్ కె. వర్మ రాసిన ‘గాలిబ్: దమ్యాన్, ద టైమ్స్’ గ్రంథాన్ని ‘గాలిబ్ నాటి కాలం’ అనే పేరుతో తెలుగులోకి తెచ్చారు.