అనువాద మధు బిందువులు-70

[కేంద్ర సాహిత్య అకాడమీ అనువాద పురస్కార గ్రహీత శ్రీ ఎలనాగ సంచిక పాఠకుల కోసం ప్రత్యేకంగా జాతీయ, అంతర్జాతీయ కవితలని అనువదించి ‘అనువాద మధు బిందువులు’ పేరిట అందిస్తున్నారు.]

ప్రసిద్ధం

~

చేపల దృష్టిలో నది ప్రసిద్ధమైనది

పెద్ద శబ్దాన్ని పేరెన్నిక గన్నదిగా
భావిస్తుంది నిశ్శబ్దం
కానీ దానికి తెలుసు,
ఎవరూ సిఫార్సు చేయకపోయినా
తనకు సంపద సిద్ధిస్తుందని.

గూడు లోంచి చూస్తున్న పక్షులకు
గోడ మీద నిద్రిస్తున్న పిల్లి గొప్పది

కపోలానికి కన్నీరు ప్రసిద్ధం –
తాత్కాలికంగానైనా.

నీ ఛాతీని కరచుకున్న నీ ఊహ
గొప్పదని భావిస్తుంది నీ గుండె

భూమికి పాదరక్షలు ప్రసిద్ధం –
పలకనేలకు మాత్రమే పనికొచ్చే
బూట్లకన్న ఎక్కువగా.

వంకర తిరిగిన ఫోటోను మోసేవాడికి
అందులోని మనిషికన్న
ఆ ఫోటో ఎక్కువ విలువైనది

మార్గంలో మందహాసం చేసే పురుషులకు,
మార్కెట్లో అల్లరి చేసే పిల్లలకు
బదులుగా మందహాసం చేసే మనిషిగా
నేను ప్రసిద్ధం కావడం నాకిష్టం

గిలక, చొక్కా లోని కాజా
ఎలా ప్రసిద్ధమో అలానే ఖ్యాతిని
గడించాలని నాకోరిక
అవి ఏదో గొప్ప పని చేశాయని కాదు
తాము ఏం చేయగలవో మరవవు అవి

ఆంగ్లమూలం: నెయోమీ షీహాబ్ నై
అనువాదం: ఎలనాగ