[కేంద్ర సాహిత్య అకాడమీ అనువాద పురస్కార గ్రహీత శ్రీ ఎలనాగ సంచిక పాఠకుల కోసం ప్రత్యేకంగా జాతీయ, అంతర్జాతీయ కవితలని అనువదించి ‘అనువాద మధు బిందువులు’ పేరిట అందిస్తున్నారు.]
విరుద్ధస్వర విరామం
~
ఉదాత్త వ్యక్తుల ఉన్మాదం బహుశా
పాత గాథలలోని పాత ఆచారం
‘అబ్బా నేను పిచ్చివాణ్నవుతాను’
అని వెంటనే ఉన్మాదులవుతారు వాళ్లు
కప్పుకున్న మానసిక ఆరోగ్యపు దుప్పటిని తీసేసి
చలికాలపు అగచాట్లలోకి
పరుగెత్తడానికి ఉన్మాదులవుతారు
వాళ్లు అలా నేలమీద పడుకున్నప్పుడు
క్రూర జంతువులు, పక్షులు వచ్చి
భయానికి గురవుతాయి
పాఠకుడు కూడా అంతే –
రాజూ అతని సైన్యమూ ఉదయం వేళ
చిన్నగా కేక వేస్తూ వేటాడుతుంటే
స్వస్థచిత్తం అంతర్గత క్రూరశక్తికి లోనవుతుందా
అని తలపోస్తాడు
సర్ ఓర్ఫియో అడవిలో నివసించేందుకు సమ్మతిస్తాడు
మీటలను నొక్కుతూ అతడు సృష్టించే గానం
మనకు ఉపశమనాన్నిస్తుంది
తర్వాత, ‘తీగలు ప్రతిధ్వనించనీ’
అంటుంది అతని గీతం
స్వరవైరుధ్యం అని పిలువబడేది
నిజానికి అన్నివేళలా వినపడదు
మొదటి, నాలుగవ క్రమాన్ని తీసుకుంటే
ఒకప్పుడు అది స్వరసామరస్యం
కానీ నాలుగవ స్వరాలు సమాంతరంగా పునరావృతం ఐతే
‘పోటీలో తట్టుకున్నందుకు సారీ’
అని వినిపిస్తుంది నీకు
చలికాలం వెళ్లిపోయింది
డేగల యజమాని తన పక్షులకు
రుసుమును విధించాడు
ఆంగ్లమూలం: ఫ్రెడరిక్ టిబెట్స్
స్వేచ్ఛానువాదం: ఎలనాగ
వృత్తిరీత్యా వైద్యులైన శ్రీ ఎలనాగ (డాక్టర్ నాగరాజు సురేంద్ర) ప్రవృత్తి రీత్యా సాహితీవేత్త. కవిగా, భాషావేత్తగా, విమర్శకుడిగా, అనువాదకుడిగా సుప్రసిద్ధులు.
కేంద్ర సాహిత్య అకాడమీ అనువాద పురస్కార గ్రహీత. తెలుగులోనూ, ఆంగ్లంలోనూ రచనలు చేసే ఎలనాగ గారు సుమారు 40 గ్రంథాలు వెలువరించారు.
‘ఫేడెడ్ లీవ్స్ అండ్ ఫ్లైస్’, ‘ఇంప్రెషన్-ఇమేజెస్’, ‘మెమొరబుల్ మెలోడీ మేకర్స్ అండ్ అదర్ పోయెమ్స్ ఆన్ మ్యూజిక్’ మొదలైనవి ఆయన తెలుగు నుండి ఆంగ్లంలోకి తెచ్చిన కవితా సంపుటాలు.
వట్టికోట ఆళ్వార్ స్వామి, దాశరథి కృష్ణమాచార్య, కాళోజీ నారాయణరావు వంటి సుప్రసిద్ధ తెలుగు రచయితల కథలను, నవలలను ఆయన ఆంగ్లంలోకి తీసుకువచ్చారు. వివిధ దేశాల సాహిత్యాన్ని కూడా ఆయన తెలుగు పాఠకులకు అందించారు. వాటిలో ఉత్తమ లాటిన్ అమెరికన్ కథలు, ఉత్తమ ఆఫ్రికన్ కథలు, సోమర్సెట్ మామ్ కథలు ఉన్నాయి.
వివిధ దేశాల కథల అనువాద గ్రంథం ‘కథాతోరణం’ వెలువరించారు. పవన్ కె. వర్మ రాసిన ‘గాలిబ్: దమ్యాన్, ద టైమ్స్’ గ్రంథాన్ని ‘గాలిబ్ నాటి కాలం’ అనే పేరుతో తెలుగులోకి తెచ్చారు.