[మౌమితా ఆలం రచించిన కవితని ‘ఆగస్ట్ – మృత్యు మాసం!’ అనే పేరుతో తెలుగులో అందిస్తున్నారు ప్రముఖ రచయిత్రి గీతాంజలి. Telugu Translation of Moumita Alam’s poem ‘August the month of death!’ by Mrs. Geetanjali.]
~
పేపర్ మీద నేను ఆగస్టులో పుట్టినట్లుంటుంది.
పాలిపోయి బలహీనంగా
తక్కువ బరువుతో ఉన్న నన్ను నా జన్మ భూమి నుంచి
కత్తెరలతో బలవంతంగా లాగారు!
నా తల్లికి అప్పుడు రక్తం చాలా పోయింది
ఇంకా పోతూనే ఉంది!
***
ఆమె కడుపు మీది భయంకరమైన కోతలు, గాట్లు ఇప్పటివా?
యుగాల కాలం నాటివి!
అవి అప్పుడప్పుడూ ఉన్నట్లుండి తేడాగా, కరుణ లేని ఊహల్లోంచి,
రాడ్క్లిఫ్ దేశవిభజన రేఖ అంత ఎరుపు రంగులో
కాకపోయినా ఖచ్చితంగా అంతే ఎర్రగా కోయబడుతుంది!
***
మా అమ్మ కడుపు కోసి నన్ను బయటకు లాగేటప్పుడే
అంతగా అనుభవం లేని మంత్రసాని
నా ఆత్మని కూడా లాగి చింపి పడేసింది!
నా కవల సోదరి తన అనారోగ్యానికి
నన్ను నిందించింది.
నేనేమైనా ఊరుకున్నానా?
నేనూ ఆమెను శపించాను!
***
మేమేమీ సలీం సినాయి లాగా అర్థరాత్రి పిల్లలం కాదు!
ఏ మాయా మంత్రమూ లేకుండానే నేను 15 ఆగస్ట్ కి పుట్టాను.
కానీ మోయలేనంత మృత్యుభారంతో!
***
ఆమె కడుపు మీది గాయపు
మాంసం పుండుగా మారుతుంది!
నేను నా తల్లి భరించలేని నొప్పితో చేసే
మూలుగుని నిస్సహాయంగా వింటాను!
ఆమె ఇంకా శ్వాస తీసుకుంటోందా లేక
నేనేమన్నా భ్రాంతికి లోనవుతున్నానా?
***
ఓహ్., జెండా ఒకటి ఆమె గొంతులో దిగబడింది!
ఆమె ఇక స్పందించదు.
బహుశా అసలు మాట్లాడలేదు!
ఎందుకంటే ఇది ఆగస్టు నెల!
మృత్యువు కరాళ నృత్యం చేసిన నెల!
~
మూలం: మౌమితా ఆలం
అనుసృజన: గీతాంజలి
శ్రీమతి గీతాంజలి (డా. భారతి దేశ్పాండే) వృత్తిరీత్యా సైకోథెరపిస్ట్, మారిటల్ కౌన్సిలర్. కథా, నవలా రచయిత్రి. కవయిత్రి. అనువాదకురాలు. వ్యాస రచయిత్రి. ‘ఆమె అడవిని జయించింది’, ‘పాదముద్రలు’. లక్ష్మి (నవలిక). ‘బచ్చేదాని’ (కథా సంకలనం), ‘పహెచాన్’ (ముస్లిం స్త్రీల ప్రత్యేక కథా సంకలనం), ‘పాలమూరు వలస బతుకు చిత్రాలు’ (కథలు), ‘హస్బెండ్ స్టిచ్’ (స్త్రీల విషాద లైంగిక గాథలు) ‘అరణ్య స్వప్నం’ అనే పుస్తకాలు వెలువరించారు. ‘ఈ మోహన్రావున్నాడు చూడండీ..! (కథా సంపుటి)’ . ఫోన్: 8897791964