[శ్రీ పెద్దాడ సత్యప్రసాద్ రచించిన ‘చివరి ఊపిరి’ అనే కవితని పాఠకులకి అందిస్తున్నాము.]
అమ్మ కడుపులో
తొమ్మిది నెలల పాటు
ఎంతో పోరాటం చేసి
భూమి మీదకు వచ్చాం
క్షణికావేశంతోనో
సమస్యలు వున్నాయనో
విలువైన జీవితాన్ని
మధ్యలోనే తుంచేయడం కంటే
నమ్మకద్రోహం ఆత్మకు లేదు
అంతకంటే పిరికితనం వేరేది లేదు
ఆత్మహత్య చేసుకుంటే
పుట్టుకే నిన్ను అసహ్యించుకుంటుంది
తిట్టుకుని మరీ ఆత్మ అపహాస్యం అవుతుంది
గట్టు ఎపుడూ దూరంగానే ఉంటుంది
పట్టుబట్టి చేరుకోవాలి కానీ
నది మధ్యలో జలసమాధి కారాదు
జీవితం ఎంత భారమైనా
ఇష్టంగానే సాగించాలి
చివరి ఊపిరి కూడా నీదే అనిపించాలి.
పెద్దాడ సత్యప్రసాద్ విశాఖపట్నం జిల్లా వాస్తవ్యులు, కవిగా, రచయితగా దశాబ్దాల ప్రయాణం. వీరి కధలు, కవితలు వివిధ పత్రికలలో ప్రచురితమవడమే కాక, ఆకాశవాణి విశాఖపట్నం కేంద్రం ద్వారా కూడా ప్రసారం అయ్యాయి. ఇక, వృత్తిగతంగా పాత్రికేయులు. రెండున్నర దశాబ్దాలకు పైగా పాత్రికేయ వృత్తిలో అంకితభావంతో పనిచేస్తున్నారు. రాజకీయ విశ్లేషణలు వీరి ప్రత్యేకత. ప్రస్తుతం ఆకాశవాణి విశాఖపట్నం ప్రాంతీయ వార్తా విభాగంలో న్యూస్ ఎడిటర్గా పనిచేస్తున్నారు.