[శ్రీ శరణ్‌కుమార్ లింబాలే గారి మరాఠీ కవితని తెలుగులో అనువదించి అందిస్తున్నారు డా. గీతాంజలి.]
నేను ఎన్నుకున్న ఈ దారి నుంచి నన్నెవవరూ కూడా తప్పించలేరు!
ఎందుకంటే గొప్ప ఆత్మ విశ్వాసంతో.. మొండిగా నిలబడ్డాను నేను.
ఎవరిదైనా సరే గాఢమైన మోసపూరిత కౌగిలిలో ఇమడడానికి.,
లేదా చెట్టుని ఉన్న చోటే నిలబెట్టటానికి
తాడుతో భూమిలో పాతిన మేకులాంటి వాడిని కాలేను!
ఏదేమైనా సరే మీ చట్టాలన్నీఅమిత పాశవికమైనవి కదా!
వినండి! నన్నెవవరూ లొంగదీసుకోలేరు., భ్రష్టు పట్టించనూ లేరు!
ఎందుకంటే., బయటా-లోపలా నిర్మలమైన వాడిని నేను.
నా బలం తెలిసిన వాడిని!
నా మాటలపై నమ్మకం ఉన్నవాడిని!
నా దారిలో ఎవరూ కాలు పెట్టలేరు.
ఈ దారి నాది మాత్రమే!
రాజమార్గం కంటే కూడా ముఖ్యమైనది!
తెలుసుకోండి! ఈ దారి మీద నిలబడే నన్ను నేను ఈ లోకానికి నిరూపించుకున్నాను!
నా జీవితం ఎవరి దయాదాక్షిణ్యాల మీద నిలబడింది కాదు.
నా దారిలో నేను స్వయంభువుని!
నా దారికి ఎవరు అడ్డంకి కాలేరు.
ఇది నా దారి., జబర్దస్త్ దారి!
సరైన దిశలోనే నా బలమైన అడుగులు పడుతున్న దారిది.
చూడండీ., నాకు రాజ్యాభిషేకం జరగడమే సరి అయింది!
ఎన్ని రాజకీయాలైనా నడవనీ గాక!
ఎన్ని దుష్ప్రచారాలన్నా చెలరేగనీ.,
ద్వేషపు బాజార్లు నిండి పోనీ గాక.,
జరగాల్సింది మాత్రం నా ప్రజల రాజ్యాభిషేకమే!
ఇదిగో వినండి! నా శక్తి ఏంటో., నాకు బాగా తెలుసు!
ఇది గుర్తు పెట్టుకోండి!
నా చుట్టూ ఉన్న అసంఖ్యాకమైన .. సాధారణమైన., మనుషుల కరుణతో,
నా కలలు తడిసి ఉన్నాయి!
విముక్తి ఆకాంక్షతో ఉప్పొంగుతున్న ఆశయం నాది.
నువ్వేం చేసినా లొంగని విజేతని నేను!
నీకు తెలీదు! నా మనసులో వేల మేఘాలు ఉరుముతున్నాయి.
నా మనసు ఆ నల్లటి మేఘాలతో నిండిపోయి గర్జిస్తున్నది!
ఓహ్హ్., గాలి వేగంగా వీస్తూంది, మెరుపులు మెరుస్తూ ఉన్నాయి.
దీన జనం ఎలా రక్షణ కోసం, భధ్రత కోసం, పరుగెడుతున్నారు చూడండటు!
తుఫానుగా మారి వర్షించడానికి.,
నా దారి పూర్తిగా తెరుచుకుంది ఇప్పుడు.
~
మరాఠీ మూలం: శరణ్‌కుమార్ లింబాలే. హిందీ: రీనా త్యాగి. తెలుగు అనువాదం: గీతాంజలి.
శ్రీమతి గీతాంజలి (డా. భారతి దేశ్‌పాండే) వృత్తిరీత్యా సైకోథెరపిస్ట్, మారిటల్ కౌన్సిలర్. కథా, నవలా రచయిత్రి. కవయిత్రి. అనువాదకురాలు. వ్యాస రచయిత్రి. ‘ఆమె అడవిని జయించింది’, ‘పాదముద్రలు’. లక్ష్మి (నవలిక). ‘బచ్చేదాని’ (కథా సంకలనం), ‘ప‌హెచాన్‌’ (ముస్లిం స్త్రీల ప్రత్యేక కథా సంకలనం), ‘పాలమూరు వలస బతుకు చిత్రాలు’ (కథలు), ‘హస్బెండ్ స్టిచ్’ (స్త్రీల విషాద లైంగిక గాథలు) ‘అరణ్య స్వప్నం’ అనే పుస్తకాలు వెలువరించారు. ‘ఈ మోహన్రావున్నాడు చూడండీ..! (కథా సంపుటి)’ త్వరలో రానున్నది. ఫోన్: 8897791964