[శ్రీ పెద్దాడ సత్యప్రసాద్ రచించిన ‘ఎప్పటికీ అపరిచితుడవే’ అనే కవితని పాఠకులకి అందిస్తున్నాము.]
ఎంతటి గొప్ప లక్ష్యం అయినా
జీవితం కంటే ఎపుడూ చిన్నదే
ఎంతగా డబ్బు సంపాదించినా
సంతృప్తి ముందు దిగదుడుపే
ఎంతటి సౌందర్యం చూసినా
మనసు అందం ముందు తక్కువే
పున్నమి వెన్నెల అయినా
అనురాగం ముందు తీసికట్టే
ఎంతగా ఊపిరి బిగబట్టినా
ఆఖరి శ్వాసతో పటాపంచలు
ఎంతటి గుర్తింపు పొందామనుకున్నా
నీవు నీకు ఎప్పటికీ అపరిచితుడవే
పెద్దాడ సత్యప్రసాద్ విశాఖపట్నం జిల్లా వాస్తవ్యులు, కవిగా, రచయితగా దశాబ్దాల ప్రయాణం. వీరి కధలు, కవితలు వివిధ పత్రికలలో ప్రచురితమవడమే కాక, ఆకాశవాణి విశాఖపట్నం కేంద్రం ద్వారా కూడా ప్రసారం అయ్యాయి. ఇక, వృత్తిగతంగా పాత్రికేయులు. రెండున్నర దశాబ్దాలకు పైగా పాత్రికేయ వృత్తిలో అంకితభావంతో పనిచేస్తున్నారు. రాజకీయ విశ్లేషణలు వీరి ప్రత్యేకత. ప్రస్తుతం ఆకాశవాణి విశాఖపట్నం ప్రాంతీయ వార్తా విభాగంలో న్యూస్ ఎడిటర్గా పనిచేస్తున్నారు.