[శ్రీ పెద్దాడ సత్యప్రసాద్ రచించిన ‘గూడేంది గువ్వేంది’ అనే కవితని పాఠకులకి అందిస్తున్నాము.]
పాత బడిన కొంపలో
రాత మారని రొంపిలో
ఈతి బాధల వేధింపులో
సొంతమనుకుని కాపురం
అంతు తెలియని పయనం
ఇంతయినా తీరదు మోహం
వింతగా వుంది జీవనం
బంధాలు బంధీలు
బతుకంతా ఇదే తంతు
కూసింతైనా సుఖమేదీ
ఆవగింజైనా ఆనందమేదీ
భ్రమల మధ్యన నడయాడుతూ
భ్రమరంగా తిరుగుడూ
అందులోనే గుడుగుడుగుంచెంగా
దింపుడు కళ్ళెం ఆశగానే
కాలాన్ని కాలరాస్తూ
సాగిపోతోంది ఉసురంతా
చిలకెగిరిపోగానే .మసక తీరగానే
గూడేంది గువ్వేంది
గొడవలేవీ గోల అసలేంది
పెద్దాడ సత్యప్రసాద్ విశాఖపట్నం జిల్లా వాస్తవ్యులు, కవిగా, రచయితగా దశాబ్దాల ప్రయాణం. వీరి కధలు, కవితలు వివిధ పత్రికలలో ప్రచురితమవడమే కాక, ఆకాశవాణి విశాఖపట్నం కేంద్రం ద్వారా కూడా ప్రసారం అయ్యాయి. ఇక, వృత్తిగతంగా పాత్రికేయులు. రెండున్నర దశాబ్దాలకు పైగా పాత్రికేయ వృత్తిలో అంకితభావంతో పనిచేస్తున్నారు. రాజకీయ విశ్లేషణలు వీరి ప్రత్యేకత. ప్రస్తుతం ఆకాశవాణి విశాఖపట్నం ప్రాంతీయ వార్తా విభాగంలో న్యూస్ ఎడిటర్‌గా పనిచేస్తున్నారు.