ఆకాశాన్ని చేతి వేళ్ళతో
అందుకుంటున్న పావన భావన
చూసే కనులకు కొత్త చూపు తోచే
దారికి ఇరువైపులా పచ్చదనం
పరుచుకున్న ఆకుపచ్చ తివాచీ
నిటారుగా నిలబడిన వేళ్ళు నేలలో
గాలిని ఊపుతున్న విసన కర్రల ఆకులు
సాగిపోయే బాటసారికి
ఒకింత సేదదీర్చగ నీడనిచ్చే
కొమ్మ గొడుగు
ఆకలి తీర్చగా ఆకుకొమ్మల నిండుగ
ఆహార ఫలములు
ఆమ్లజనిని అందించు జీవజాలానికి
జీవక్రియలో ఊపిరి గాలి నిచ్చు
గుల్మమే పొదరింటి పైకప్పుగా మారి
చిరు జీవకోటికి ఆశ్రయమిచ్చు
ఆకుపచ్చని మైదానంలో
హరిత హర్మ్యాలు జీవించి
జీవరాశికి కలిగించు ఉపయోగాలన్నో
జీవించే పచ్చని చెట్లు
హరిత హర్మ్యాలుగా నింగిని చేరు
మబ్బులతో ఆటలాడి
వనమంతా తడి తడిగా
వాన కురియ పులకించు పుడమి
ప్రకృతిలో చెట్లు
ప్రగతికి మెట్లుగా విలసిల్లు
మానవాళికి మరువలేని నేస్తాలు
చెట్టూ చేమ మనిషి బతుకు పుస్తకాలు
డా.టి.రాధాకృష్ణమాచార్యులు సీనియర్ వైద్యులు, ప్రముఖ కవి,రచయిత, అనువాదకులు, సమీక్షకులు.
5 సంకలనాలు తెలుగు కవిత్వంలో 1999 నుండి కరీంనగర్ నుండి పబ్లిష్ చేశారు. నలిమెల భాస్కర్ ‘సాహితీ సుమాలు’ వివిధ భారతీయ భాషల్లోని సాహితీవేత్తల పరిచయ సంకలనాన్ని “The Speaking Roots” Title తో ఆంగ్లంలోకి అనువాదం చేసినారు.