మహారాష్ట్ర తెలుగు సాహిత్య అకాడెమీ నిర్వహించిన అద్భుతమైన సాహిత్య సాంస్కృతిక కార్యక్రమం – నివేదిక

(జూన్ నెల 28న మహారాష్ట్రలోని అహిల్యానగర్ లో మహారాష్ట్ర తెలుగు సాహిత్య అకాడెమీ నిర్వహించిన సాహిత్య సాంస్కృతిక కార్యక్రమం వివరాలు అందిస్తున్నది సంచిక టీమ్. ఫోటోలు అందచేసినది మహారాష్ట్ర తెలుసు సాహిత్య అకాడెమీ)

జూన్ 28న, మహారాష్ట్రకు చెందిన అహిల్యానగర్ లోని తెలుగువారంతా అమర్ ధామ్ రోడ్ లోని మార్కండేయ సంకుల్ వద్ద అయిదుగంటల నుండే చేరుకోవటం ఆరంభించారు. ఆ రోజు సాయంత్రం ఆరు గంటలకు అక్కడ మహారాష్ట్ర తెలుగు సాహిత్య అకాడెమీ వారు, మహారాష్ట్ర ప్రభుత్వ సాంస్కృతిక కార్యకలాపాల విభాగం సౌజన్యంతో ఏర్పాటు చేస్తున్న సాహిత్య సాంస్కృతిక కార్యక్రమం ఉంది.

ఈ కార్యక్రమాన్ని సహ సంచాలకులు, సభ్య కార్యదర్శి అయిన శ్రీ సచిన్ నింబాళ్కర్, సారధ్యంలో మహారాష్ట్ర తెలుగు సాహిత్య అకాడెమీ నిర్వహించింది. ఈ కార్యక్రమ సమన్వయ కమిటీ సభ్యులు శ్రీ జగన్ బాబు గంజి, శ్రీ అశోక్ కంటె, శ్రీ అంబల్ల జనార్ధన్, శ్రీ సురేఖ కోడంలు ఈ కార్యక్రమం విజయవంతం చేసేందుకు ఎంతో శ్రమపడ్డారు. కార్యక్రమ నిర్వహణలో ప్రతి విషయంలో శ్రద్ధ తీసుకున్నారు. కార్యక్రమం దిగ్విజయవంతం చేయాలన్న పట్టుదల, దీక్షలతో, సాహిత్య అకాడెమీ సభులు కంటె అశోక్, హరీశ్ లు స్థానిక సమన్వయ కమిటీ సభ్యులు సురేఖా కోడెమ్, భీమరాజు కోడెమ్ లతో కలసి అహిల్యా నగర్ లో నివసిస్తున్న తెలుగు వారినే కాదు, సాహిత్యం, సాంస్కృతిక కార్యక్రమాలపై ఆసక్తి ఉన్న వారందరినీ, వ్యక్తిగతంగా కలసి ఆప్యాయంగా ఆహ్వానించారు. దాంతో, కార్యక్రమం ఆరంభానికి ముందే హాలు కిటకిట లాడటమే కాదు, ఆరోజు అహిల్యా నగర్ మొత్తం అక్కడే ఉన్నట్టనిపించింది.

అనుకున్న సమయానికి సరిగా, వేదమంత్రోచ్చారణ నడుమ  దీప ప్రజ్వలనం జరిగింది. సాహిత్య కార్యక్రమాలలో దీప ప్రజ్వలనం చేయకపోవటం అభ్యుదయం, నాగరీకం అనుకునే అనేక తెలుగు సాహిత్య కార్యక్రమాల అలవాటయిన  అనుభవం ముందు, వేద మంత్రోచ్చారణ నడుమ, వినాయకుడి విగ్రహం ముందు, శ్రద్ధా భక్తులతో దీపప్రజ్వలనం చేయటం ఒక అద్భుతమైన అనుభవం.  దీప ప్రజ్వలనం అవుతూనే, చిన్న, పెద్ద, యువతులు, మహిళలు ముక్తకంఠంతో “గణపతి బప్పా మోరెయా” అని నినదించటం మరపురాని అనుభవం.

కార్యక్రమం ‘సంగీత సరస్వతి లతామంగేష్కర్ వ్యక్తిత్వం’ పై కస్తూరి మురళీకృష్ణ ప్రసంగంతో  ఆరంభమయింది. తెలుగులో సాగిన ప్రసంగాన్ని హాలులో ఉన్న అందరూ శ్రద్ధగా విన్నారు. ఆనందాన్ని చప్పట్లతో వ్యక్తపరచారు. కొన్ని దశాబ్దాలుగా మహారాష్ట్రలో స్థిరపడినా తమ మాతృభాషను పదిలపరచుకుంటూ వస్తున్నవారు ఉపన్యాసం పూర్తయిన తరువాత సుదీర్ఘ కరతాళ ధ్వనులతో తమ ఆనండాన్ని వ్యక్త పరచారు.

తరువాత వెంటవెంటనే జట్లు జట్లుగా పిల్లలు, పెద్దలూ, యువతీ యువకులు అత్యద్భుతమయిన రీతిలో సాంప్రదాయిక సాంస్కృతిక కార్యక్రమాలని ప్రదర్శించారు. హాలులో ఉన్న ప్రతి ఒక్కరూ హర్షాన్ని వ్యక్తపరచారు. వారి ప్రదర్శనలకు ఆ రోజు ఆ ప్రాంతంమంతా ఆనందార్ణవమయింది. అలలు ఎగసెగసి పడేట్టు, ఉత్సాహం, ఉల్లాసం, ఆనందం, అభినందనలు ఎగసెగసిపడ్డాయి. కేరింతలు, నవ్వులు, చప్పట్లు, ఈలలు, అభినందనల ఆలాపనలు, ఒక సంబర వాతావరణం కొన్ని గంటలపాటూ నెలకొంది.

ముఖ్యంగా బతుకమ్మ, మంగళగౌరీ నృత్యాలకు సంబరాలు అంబరాన్ని దాటాయి. కోలాటం ఆటలో ఆడుతూ పలు విభిన్నమయిన విన్యాసాల ప్రదర్శన మంత్రముగ్ధులను చేసింది. అన్నిటినీ మించి కోలాటమాడుతూ ఏనుగు నడకను ప్రదర్శించినప్పుడు, హాలులో నుంచుని హర్షాతిరేకాలు చేయనివారు లేరు. కొన్ని గంటలు క్షణాల్లా గడచిపోయాయి. అహిల్యానగర్ ఎప్పుడూ ఇలాంటి సంబరాలను చూడలేదని ముక్తకంఠంతో అన్నారందరూ.

ఆ తరువాత ఈ కార్యక్రమంలో పాల్గొన్న ప్రతిఒక్కరికీ, జ్ఞాపికను, ఒక సర్టిఫికేట్‌నూ అందచేశారు. మొత్తం  108 మంది పాల్గొనేట్టు చేసి సెర్టిఫికేట్లు మొమెంటోలూ ఇవ్వటం లక్ష్యంగా అనుకున్న అకాడెమీ, చివరికి   120 మందికి మొమెంటోలు అందచేసింది. ఆయా సర్టిఫికేట్లు, మొమెంటోలతో అండరూ గ్రూప్ ఫోటో దిగేరు ఈ మధురమైన అనుభవాన్ని నిశ్చల జ్ఞాపక చిత్రంగా మలచుకునేందుకు.

కార్యక్రమం అయిపోయిన తరువాత ప్రతి ఒక్కరూ నిర్వాహకుడు, కంటె అశోక్ ను ‘తదుపరి కార్యక్రమం ఎప్పుడు?’ అని అడిగేవారే. ప్రతి ఒక్కరూ, కంటె అశోక్ ను అందరినీ కలుపుకుని, అత్యంత సమన్వయంతో కార్యక్రమాన్ని అద్భుతంగా నిర్వహించినందుకు అభినందిచేవారే!

ఈ కార్యక్రమంలో నిర్వహించిన నృత్య ప్రదర్శనల వివరాలు;

సంచిక టీమ్

sanchika.com