[శ్రీ పెద్దాడ సత్యప్రసాద్ రచించిన ‘మనసు తలుపు తట్టకు’ అనే కవితని పాఠకులకి అందిస్తున్నాము.]
మనసు తలుపు తట్టకు
తట్టుకోలేవు
కదిపి చూడకు
కాళ్ళూ చేతులూ ఆడవు
చిచ్చి కొట్టి వుంచు
బుజ్జి పాపాయిల హాయిగా నవ్వుతుంది
రెచ్చగొట్టి చూశావో
చిచ్చు రేపుతుంది
బుట్టలో పెట్టేందుకు పాము కాదు
బుస కొట్టి వూరుకోవడానికి
నస పెట్టి చంపుతుంది
నిన్ను నిన్నుగా వుండనీయదు
నిన్నే రెండుగా చేస్తుంది
నిలువునా చీలుస్తుంది
నరకాన్ని ముంగిటిలోకే తెస్తుంది
ప్రళయాన్ని పరిచయం చేస్తుంది
అందుకే మనసు జోలికి పోకు
జీవం లేని మనిషివవుతావు
ఏ భావం లేకుండా పోతావు
పెద్దాడ సత్యప్రసాద్ విశాఖపట్నం జిల్లా వాస్తవ్యులు, కవిగా, రచయితగా దశాబ్దాల ప్రయాణం. వీరి కధలు, కవితలు వివిధ పత్రికలలో ప్రచురితమవడమే కాక, ఆకాశవాణి విశాఖపట్నం కేంద్రం ద్వారా కూడా ప్రసారం అయ్యాయి. ఇక, వృత్తిగతంగా పాత్రికేయులు. రెండున్నర దశాబ్దాలకు పైగా పాత్రికేయ వృత్తిలో అంకితభావంతో పనిచేస్తున్నారు. రాజకీయ విశ్లేషణలు వీరి ప్రత్యేకత. ప్రస్తుతం ఆకాశవాణి విశాఖపట్నం ప్రాంతీయ వార్తా విభాగంలో న్యూస్ ఎడిటర్‌గా పనిచేస్తున్నారు.