[శ్రీ పెద్దాడ సత్యప్రసాద్ రచించిన ‘మృత్యువాగదు’ అనే కవితని పాఠకులకి అందిస్తున్నాము.]
విర్రవీగకు తుళ్ళిపడకు
రోజు నీదని జులుం చేయకు
కాలం మారినపుడు
కాలు జారినపుడు
వీలు లేని రోజు నీదవుతుంది
కూసాలు కదిలినపుడు
గోస ఎవరికీ పట్టనపుడు
శ్వాస అందడమే కష్టమైనపుడు
అంతా పూర్తిగా అర్ధం అవుతుంది
నా వారు అనుకున్న వారు
కాని వారుగా మారినపుడు
కనబడకుండా పోతున్నపుడు
మనసు భారంగా మూలిగినపుడు
ఎంత ఒంటరివో బోధపడుతుంది
ఎంతగా వేడుకున్నా
మరెంతగా ప్రాధేయపడినా
చేసిన తప్పులు ఎదురు నిలబడతాయి.
పశ్చాత్తాపం ప్రకటించినా
పాపాలను కడిగేసుకోవాలనుకున్నా
కుదిరేది ఉండదు సమయమూ ఉండదు
చీకటి తాటకిగా మారి
విరుచుకుపడిన వికృత వేళ
ఏం చెప్పినా మృత్యువు వినదు
ఎంత ఆపినా మృత్యువాగదు
పెద్దాడ సత్యప్రసాద్ విశాఖపట్నం జిల్లా వాస్తవ్యులు, కవిగా, రచయితగా దశాబ్దాల ప్రయాణం. వీరి కధలు, కవితలు వివిధ పత్రికలలో ప్రచురితమవడమే కాక, ఆకాశవాణి విశాఖపట్నం కేంద్రం ద్వారా కూడా ప్రసారం అయ్యాయి. ఇక, వృత్తిగతంగా పాత్రికేయులు. రెండున్నర దశాబ్దాలకు పైగా పాత్రికేయ వృత్తిలో అంకితభావంతో పనిచేస్తున్నారు. రాజకీయ విశ్లేషణలు వీరి ప్రత్యేకత. ప్రస్తుతం ఆకాశవాణి విశాఖపట్నం ప్రాంతీయ వార్తా విభాగంలో న్యూస్ ఎడిటర్‌గా పనిచేస్తున్నారు.