[శ్రీ విస్సాప్రగడ వేంకట కృష్ణ సాయి రచించిన ‘నా జీవితం – నా చరితం’ అనే కవితని అందిస్తున్నాము.]
ఈనాడు ఇలా..
మరునాడు మరోలా..
కొన్నిసార్లు ఒంటరిగా
కొన్నిచోట్ల ఉమ్మడిగా
కలిసి సంబరాలు కొన్నాళ్ళు
కరగని కన్నీళ్ళు కొన్నేళ్ళు
వినిపించుకోని విమర్శలు
పొగడ చెట్టెకించే పొగడ్తలు
కొరతతో గడిపిన పగళ్ళు
కోరిక కన్నుల రాత్రిళ్ళు
నవ్వుల పువ్వుల బాల్యం
నవవసంతపు యవ్వనం
నడివయస్సు సంధ్యాకాలం
నడుము వంగిన వార్ధక్యం
రాజాలా బతకాలన్న మోజులు
రాజీతో గడిపేసిన రోజులు
నన్ను నేను మరిచిన క్షణాలు
నన్ను నేను వెతుక్కునే వీక్షణాలు
చెరిగిపోని జ్ఞాపకాలు
చెదిరిపోయిన వాస్తవాలు
చేరువలో లేని ఆశయాలు
శిలాఫలఖాన మిగిలిన విజయాలు
హృదయఫలఖాన మెదిలే స్మృతులు
కనుల ముందే జననాలు మరణాలు
కంచికి చేరుకున్న కథల నిదర్శనాలు
అలుపులేని అలలతో తీరం కోసం పరుగులు
ఆగిపోని ఆటల్లో ఓటమివిజయాల వలయాలు
ఊపిరి ఉయ్యాలల్లో భ్రమించే రంగులరాట్నాలు
ఉలుకు పలుకు చివరి హోమానికి అంకితాలు
వెరసి తూచేలోగా అంతర్ధానం నా జీవితం
తెరిచి మూసేలోగా సమాప్తం నా చరితం
విస్సాప్రగడ వేంకట కృష్ణ సాయి స్వస్థలం ఏలూరు. సర్ సి అర్ అర్ కాలేజ్ లో పట్టభద్రులై ఆంధ్రప్రదేశ్ రాష్ట్ర రోడ్డు రవాణా సంస్థలో కొద్ది కాలం పనిచేసి, 1997 లో అమెరికా వలస వెళ్లి బోస్టన్ పరిసర ప్రాంతంలో స్థిరపడ్డారు. వృత్తి రీత్యా సమాచార సాంకేతిక (IT) రంగంలో చాలా సంవత్సరాల నుంచి పని చేస్తున్నారు. కాలేజీ రోజుల నుంచి కవితా సాహిత్యం పై మక్కువ. ఏవో చిన్న చిన్న పద కవితలు వ్రాసుకుని బంధువర్గం తోను మిత్రుల తోను పంచుకుని సంతోషపడేవారు. ప్రముఖుల రచనలు చదవడం ఇష్టం. బోస్టన్ పరిసర ప్రాంతాల తెలుగు సంఘం మరియు న్యూ ఇంగ్లాండ్ షిరిడి సాయి పరివార్ దేవాలయంలో స్వచ్ఛంద స్వేచ్ఛా శ్రమదానం చేయడం ఇష్టపడతారు.