[శ్రీ కరణం నారాయణ స్వామి పిళ్లై గారి ‘నాలుగడుగుల నడక’ అనే కవితను అందిస్తున్నాము.]
తొలి అడుగే – పుట్టుక
ఇంటి వాకిట పచ్చని తోరణం కట్టిన వేళ
పసి కంఠం విప్పిన ఊపిరి సవ్వడి..
అమ్మ తన్మయత్వం, నాన్న గర్వం కలగలిసి
ఊహల ఉయ్యాలలో ఒక కొత్త ప్రాణం మొదలైంది!
రెండవ అడుగే – ఆశల సవ్వడి
బుడిబుడి అడుగుల అలజడిలో ఒక ఆశ
తడబడే పలుకుల అమాయకత్వంలో ఒక తీపి
పిల్లల చిరునవ్వులే ప్రపంచంగా మారి
తల్లిదండ్రుల కళ్ళలో వేల రంగుల కలలు విరిశాయి!
మూడవ అడుగే – చదువుల పోరాటం
అక్షరాల దిద్దుడుతో మొదలైన విజ్ఞాన యాత్ర
పుస్తకాల బరువులో భవిష్యత్తును వెతుకుతూ..
కంటికి కునుకు లేని రాత్రుళ్ళు, పట్టుదలలు
ప్రయోజకులు కావాలనే తపనతో సాగిన విద్యా యజ్ఞం!
నాలుగవ అడుగే – పెళ్ళి పందిరి
ఊహలు నిజమై, బాధ్యతలు పండిన సమయం
ఒక కొత్త బంధానికి పచ్చని అక్షింతల దీవెన..
కన్నవారి కళ్ళలో బాధ్యత తీరిన తృప్తి
కానీ, గూడు విడిచి వెళ్తున్నారనే చిన్నపాటి కన్నీటి చారిక!
[కలల పందిరి – బాధ్యతల పయనం-జీవితం అనేది ఒక నిరంతర ప్రవాహం. ఆ ప్రవాహంలో మనిషి వేసే ప్రతి అడుగు ఒక కొత్త పాఠం, ప్రతి బంధం ఒక మధుర జ్ఞాపకం. పసిపాప తొలి ఏడుపుతో మొదలై, పెళ్ళి పీటల మీద బాధ్యతగా పరిమళించే ఈ అద్భుత ప్రయాణాన్ని ఆవిష్కరించే చిన్న ప్రయత్నమే ఈ ‘నాలుగడుగుల నడక’.
పుట్టుక నుండి పెళ్ళి వరకు సాగే ఈ పయనంలో.. గెలుపు ఓటముల కన్నా, మనం పంచిన అనురాగం, మోసిన బాధ్యతలే శాశ్వతంగా నిలిచిపోతాయి. పిల్లలు ప్రయోజకులైన వేళ కన్నవారి కళ్ళలో కనిపించే ఆ ఆనందమే ‘జీవితం’ అనే ఉయ్యాలకు అసలైన ఊపు. ఈ మధుర స్మృతుల సమాహారమే మన సంసార సాగరం.]
కరణం నారాయణస్వామి పిళ్లై గారికి కవిత్వం వ్రాయడం అభిరుచి. అన్నామలై యూనివర్సిటీ నుంచి బి. బి. ఎ., ఐ.ఐ.ఎం. కలకత్తా నుంచి ఎం.బి.ఎ. చేశారు.
ప్రస్తుత వయస్సు 60 సంవత్సరాలు. ఓ ప్రముఖ సంస్థలో జోనల్ మేనేజర్ (సౌత్) బాధ్యతలు నిర్వహిస్తున్నారు. ప్రస్తుత నివాసం బెంగళూరు.