[శ్రీ విడదల సాంబశివరావు రచించిన ‘నీ గుడి వాకిట ముంగిట ఆశగా నిరీక్షిస్తూ..!’ అనే కవితని పాఠకులకు అందిస్తున్నాము.]
జీవన గమ్యాన్ని చేరుకోవాలని
జీవితం పడవలో బైలుదేరాను!
నేనో గొప్ప నావికుణ్ణని..
జీవన సాగరాన్ని అలవోకగా ఈదగలనని..
అహంకరించాను జ్ఞానహీనుడనై!
అయితే.. ఎంత గొప్ప నావికుడైనా
క్షణం క్షణం మారిపోయే
సముద్ర తత్వాన్ని పసిగట్టలేక
సుడిగుండాల బారినపడి
కొట్టుకుపోయే చందాన..
ఓపిక నశించగా శక్తిహీనుడనై
కష్టాల కడగండ్లలో చిక్కుకుపోయి..
ఆపన హస్తం కోసం
నీ గుడి వాకిట ముంగిట
వేచి వున్నాను ప్రభూ!
నీ సృష్టిలో..
రాజ్యమేలుతున్న కసాయితనాన్ని
ఎదిరించి నిలవాలని
పోరాడి గెలవాలని
దృఢ సంకల్పంతో ముందుకు సాగుతుంటే..
నా చుట్టు వున్న ప్రపంచంలో
క్రూర మానవ మృగాలు
విశృంఖలంగా వీర విహారం చేస్తూ
నన్ను భయకంపితుణ్ణి చేస్తున్నాయి!
నా అంతరంగంలో నిక్షిప్తమై
నన్ను పతనం అంచున నిలిపిన అహంకారం..
నా హృదయంలో నిబిడీకృతమై వున్న
సంకల్ప బలాన్ని నిర్వీర్యం చేసిన వేళ..
నా జీవన నౌక
తీవ్ర సంక్షోభంలో మునిగిపోయింది!
హృదయం లోతులన్నీ
దుఃఖ సాగరాలై..
గెలుపు తీరం కానరాక
తల్లడిల్లిపోతున్నాను!
నీ కరుణా కటాక్ష వీక్షణాల కోసం..
నీ మహాలయం ముగింట
ఆశగా నిరీక్షిస్తున్నాను!
నీ గుడి తలుపులు తెరిచి..
నీ అనుగ్రహ దృక్కులను
నా పై ప్రసరింపజేసి..
నన్నావహించి వున్న
వ్యథలనూ, వ్యాకులతలనూ
పూర్తిగా నిర్మూలించి..
నన్ను అనుగ్రహించు ప్రభూ!
శ్రీ విడదల సాంబశివరావు గారు 22 జనవరి 1952 న గుంటూరు జిల్లా, చిలకలూరిపేట పురపాలక సంఘం పరిధిలో ఉన్న పురుషోత్తమపట్నం గ్రామంలో ఓ మధ్య తరగతి ‘రైతు’ కుటుంబంలో జన్మించారు. శ్రీమతి సీతమ్మ, రాములు వీరి తల్లిదండ్రులు. స్వగ్రామంలో ప్రాథమిక విద్య, చిలకలూరిపేటలో ప్రాథమికోన్నత విద్య, తెనాలిలో బి.ఎస్.సి. పూర్తి చేశారు.
బాల్యం నుంచి నటనపై అభిరుచి ఉంది. అనేక నాటికలలోనూ, నాటకాలలోనూ నటించి ప్రశంసలందుకొన్నారు. వివిధ సంస్థల నుండి పతకాలు పొందారు. రాష్ట్రస్థాయిలో ఉత్తమ నటుడిగా బహుమతులు పొందారు. వీరు రచించిన ‘పుణ్యభూమి నా దేశం’ (నాటకం), ‘తలారి తీర్పు’ (నాటిక) ప్రసిద్ధమయ్యాయి. టివి ధారావాహికల్లోనూ, కొన్ని సినిమాల్లోనూ ముఖ్య పాత్రలు పోషించారు.
సాంబశివరావు గారు వెయ్యికి పైగా కవితలు రాశారు. వాస్తవిక జీవితాలని చిత్రిస్తూ అనేక కథలు రాశారు. కవితలు, నాటకాలు, కథలు కలిపి 14 పుస్తకాలు ప్రచురించారు. పలు పత్రికలలో ఫీచర్లు నిర్వహిస్తున్నారు.
నాటకరంగలోనూ, రచన రంగంలోనూ ఉత్తమ పురస్కారాలు అందుకొన్నారు. నీహారిక పౌండేషన్ అనే సంస్థని స్థాపించి సమాజ సేవ చేస్తున్నారు.