[‘నెలసరి మేఘ విస్ఫోటనం’ అనే అనువాద కవితని అందిస్తున్నారు ప్రముఖ రచయిత్రి గీతాంజలి. మూలం మౌమితా ఆలం.]
~
నా గర్భసంచి లోపల నెలనెలా ఒక మేఘ విస్ఫోటనం!
మనసు కృంగిపోతూ ఉంటే, దేహం
పిండిలాగా ముడుచుకుపోతూ ఉంటుంది!
కడుపులో వికారం కలిగించే, మెలితిరిగే
ఆ భయంకరమైన నొప్పి గురించి
నా మంచం మీది దుప్పటిని
గోళ్ళతో రక్కుతూ రాయాలని చూస్తాను!
కానీ ఈ నెలసరి నొప్పికి ఒక పేరంటూ ఉందా అసలు?
~
నడుం మీద కూర్చుని నా రెండు అరచేతులతో
మబ్బులను అదిమి పట్టుకొని వాటిని బుజ్జగిస్తూ
త్వరగా కరిగిపోమ్మని అడుగుతాను!
మేఘాలు కోపంగా ఉడికిపోతాయి!
నేను వణికిపోతూ తలగడను పిండేస్తూ,
వాటిని కౌగిలించుకుంటూ
నా గుండెలకు బలంగా హత్తుకుంటాను!
~
కొన్ని గంటల తర్వాత నా గర్భ సంచీలోని
మేఘాలు విస్ఫోటనం చెందుతాయి!
అలిసిపోయిన నా కళ్ళు ఆ మేఘాలన్ని
తెల్లటి పాలరాతి మీద పారుతూ
చెరువుగా మారక ముందే రక రకాల రూపాలు మారడం చూస్తాయి!
ఆ కరిగిన మేఘాలు
ఉదయపు ఆకాశం మీద పారడాన్ని కూడా
నా కళ్ళు నీరసంగా చూస్తాయి!
~
(ఈ కవిత డిస్మనోరియా అనే స్త్రీల నెలసరి ఋతుస్రవానికి సంబంధించినది. ఆ సమయంలో స్త్రీలు అనుభవించే నొప్పి తీవ్రతను తెలిపే కవిత! హిందూ పత్రిక సర్వే లో ప్రతీ పది మంది స్త్రీలలో తొమ్మిది మంది ఈ నెలసరి నొప్పిని అనుభవిస్తున్నారని తెలిపింది.)
ఇంగ్లీషు- మౌమిత ఆలం
అనువాదం -గీతాంజలి
శ్రీమతి గీతాంజలి (డా. భారతి దేశ్‌పాండే) వృత్తిరీత్యా సైకోథెరపిస్ట్, మారిటల్ కౌన్సిలర్. కథా, నవలా రచయిత్రి. కవయిత్రి. అనువాదకురాలు. వ్యాస రచయిత్రి. ‘ఆమె అడవిని జయించింది’, ‘పాదముద్రలు’. లక్ష్మి (నవలిక). ‘బచ్చేదాని’ (కథా సంకలనం), ‘ప‌హెచాన్‌’ (ముస్లిం స్త్రీల ప్రత్యేక కథా సంకలనం), ‘పాలమూరు వలస బతుకు చిత్రాలు’ (కథలు), ‘హస్బెండ్ స్టిచ్’ (స్త్రీల విషాద లైంగిక గాథలు) ‘అరణ్య స్వప్నం’ అనే పుస్తకాలు వెలువరించారు. ‘ఈ మోహన్రావున్నాడు చూడండీ..! (కథా సంపుటి)’ . ఫోన్: 8897791964