[మునీర్ నియాజి రచించిన ‘హమేషా దేర్ కర్ దేతా హూఁ మైఁ’ అనే హిందీ కవితని అనువదించి అందిస్తున్నారు శ్రీమతి గీతాంజలి. Telugu Translation of Munir Niazi’s Hindi poem by Mrs. Geetanjali.]
~
అవును.. నేనెప్పుడు చూడూ ఆలస్యం చేస్తూ ఉంటాను!
ఎవరికైనా అతి ముఖ్యమైన విషయం చెప్పాల్సి వచ్చినప్పుడు..
చేతిలో చేయి వేసి చేసిన బాసలు ఏవైనా ఉంటే.. నెరవేర్చాలనుకున్నప్పుడు..
నా నుంచి వెళ్లిపోతున్న వాళ్ళను ఒక కేకేసి పిలుచుకోవాలనుకున్నప్పుడు..
వాళ్ళను నా దగ్గరే ఎప్పటికీ ఉండిపోవడానికి వెనక్కి తిరిగి వచ్చేయమని
చెప్పటానికి కూడా అయ్యో.. చాలా ఆలస్యం చేస్తుంటాను.
***
చూడండి నేనెలాంటి వాడినో..
వాళ్ళకి నా అవసరం బాగా ఉన్నప్పుడు.. ఆదుకోడానికి..,
అమితమైన దుఃఖంలో ఉన్న దోస్తులని ఓదార్చడానికి..
చాలా దూరాల్లో ఉన్న ఆప్తులను కలవడానికి
ఎప్పటిలాగే ఆలస్యమే చేస్తుంటాను.
***
ఎప్పటికప్పుడు మారుతున్న అందమైన
ఋతువులలో అలా హాయిగా నడిచి వెళ్ళడానికి..
ఆ ఋతువులని ఆస్వాదిస్తూ వాటికి నా హృదయాన్ని ఇచ్చేయడానికి..
ఇక ఇష్టమైన వాళ్ళని ఎవరినైనా జ్ఞాపకం చేసుకోడానికి..
ఎవరినైనా మరిచి పోవడానికి.. ఎప్పటిలాగే.. ఓహ్హ్!
ఎప్పటిలాగే.. ఆలస్యం చేసేస్తుంటాను.
***
నా గురించి మీకు ఇంకోటి కూడా చెప్పాలి.. వినండి!
నా చుట్టూ ఉన్న మనుషులు మరణించడానికి ముందే..
వాళ్ళను దుఃఖం లోంచో.. మృత్యు బాధ లోంచో రక్షించాల్సి వచ్చినప్పుడు…
ఇన్నాళ్లూ దాచబడ్డ.. వాళ్ళకి మాత్రమే
తెలిసి తీరాల్సిన కొన్ని నిజాలను..
వాళ్ళకి ఖచ్చితంగా చెప్ప వలసి ఉన్నప్పుడు..
అయ్యో.. అయ్యో.. ఎప్పటిలాగే ఆలస్యం చేస్తాను!
నేనంతే.. అన్నీ కోల్పోయేదాకా..
నా నుంచి అందరూ దూరమయ్యే దాకా
ఇలా ఆలస్యం చేస్తూనే ఉంటాను!
~
మూలం: మునీర్ నియాజి
అనుసృజన: గీతాంజలి
శ్రీమతి గీతాంజలి (డా. భారతి దేశ్‌పాండే) వృత్తిరీత్యా సైకోథెరపిస్ట్, మారిటల్ కౌన్సిలర్. కథా, నవలా రచయిత్రి. కవయిత్రి. అనువాదకురాలు. వ్యాస రచయిత్రి. ‘ఆమె అడవిని జయించింది’, ‘పాదముద్రలు’. లక్ష్మి (నవలిక). ‘బచ్చేదాని’ (కథా సంకలనం), ‘ప‌హెచాన్‌’ (ముస్లిం స్త్రీల ప్రత్యేక కథా సంకలనం), ‘పాలమూరు వలస బతుకు చిత్రాలు’ (కథలు), ‘హస్బెండ్ స్టిచ్’ (స్త్రీల విషాద లైంగిక గాథలు) ‘అరణ్య స్వప్నం’ అనే పుస్తకాలు వెలువరించారు. ‘ఈ మోహన్రావున్నాడు చూడండీ..! (కథా సంపుటి)’ త్వరలో రానున్నది. ఫోన్: 8897791964