29 ఆగస్టు 2026 న తాడేపల్లి లో తెలుగు భాషా దినోత్సవం సందర్భంగా ‘తెలుగు మరియు సంస్కృత అకాడమీ’ వారి ‘గిడుగు’ పురస్కారాలను సాహితీవేత్తలకు ప్రదానం చేశారు.
తెలుగు మరియు సంస్కృత అకాడమీ అధ్యక్షులు R D విల్సన్@శరత్ చంద్ర, సంచాలకులు పి. రంజిత్ భాష ఐఏఎస్, అధికార భాషా సంఘం అధ్యక్షులు పూల త్రివిక్రమ్, ఆంధ్రప్రదేశ్ నాటక అకాడమీ అధ్యక్షులు గుమ్మడి గోపాలకృష్ణ, 20 సూత్రల అమలు కమిటీ అధ్యక్షులు లంకా దినకర్, పొట్లూరి హరికృష్ణ తదితరులు ఈ కార్యక్రమంలో పాల్గొన్నారు.
పురస్కార గ్రహీతల్లో ఒకరైన శ్రీమతి శైలజామిత్ర తన అనుభూతిని సంచిక పాఠకులతో పంచుకుంటున్నారు.
***
ఒక సత్కారం.. ఎన్నో అనుభూతులు
ఆగస్టు 29న విజయవాడలోని తాడేపల్లిలో జరిగిన తెలుగు భాషా దినోత్సవ కార్యక్రమంలో ఆంధ్రప్రదేశ్ ప్రభుత్వం తరఫున గౌరవ సత్కారం అందుకోవడం నాకు ఎంతో ఆనందాన్ని కలిగించిన అనుభవం. రచయితగా ఇంతవరకు ఎన్నో సభలకు వెళ్లాను, ఎన్నో సత్కారాలు అందుకున్నాను. కానీ ఆంధ్రప్రదేశ్ ప్రభుత్వ వేదికపై, తెలుగు భాషా దినోత్సవం సందర్భంగా గౌరవం అందుకోవడం మాత్రం నాకు ప్రత్యేకమైన అనుభూతిని ఇచ్చింది.
ముఖ్యంగా గిడుగు వెంకట రామమూర్తి జయంతిని పురస్కరించుకుని, తెలుగు భాష పరిరక్షణ గురించి పెద్దలంతా మాట్లాడుతున్న ఒక సందర్భంలో రచయితగా అక్కడ సత్కారం పొందడం మరింత సంతోషాన్ని కలిగించింది. ఒక రచయితకు తన రచనలకు లభించే గుర్తింపు ఎంత ముఖ్యమో, ఆ గుర్తింపు తన భాషకు సంబంధించిన ఒక వేదికపై లభించడం అంతకంటే గొప్ప ఆనందం.
ఆ రోజు వేదికపై వినిపించిన ప్రతి మాటా నాలో ఒక ఆలోచనను కలిగించింది. మాతృభాషను కాపాడుకోవడం అంటే కేవలం తెలుగులో మాట్లాడటం మాత్రమే కాదు. తెలుగులో ఆలోచించడం, రాయడం, చదవడం, తరువాతి తరానికి అందించడం కూడా. రచయితగా మనం చేసే పని కూడా ఈ బాధ్యతలో ఒక భాగమే అనిపించింది.
ప్రభుత్వం ఇచ్చే పురస్కారానికి ఒక ప్రత్యేకమైన విలువ ఉంటుంది. ఎందుకంటే అది వ్యక్తిగత అభినందనను దాటి, మనం చేస్తున్న సాహిత్య కృషిని ఒక సామాజిక బాధ్యతగా గుర్తించినట్టుగా అనిపిస్తుంది. అందుకే ఈ సత్కారం నాకు కేవలం ఆనందాన్ని మాత్రమే ఇవ్వలేదు; ఇక ముందు మరింత బాధ్యతగా రాయాలనే ఆలోచనను కూడా ఇచ్చింది.
నిజానికి ఆ రోజు నాకు కలిగిన ఆనందాన్ని మాటల్లో పూర్తిగా చెప్పడం కష్టం. ఇంతవరకు అందుకున్న గౌరవాల్లో ఇది ఒక ప్రత్యేకమైన స్థానం పొందింది. ముఖ్యంగా నా భాష, నా రచన, నా ప్రయాణం – ఈ మూడింటినీ ఒకే వేదికపై గుర్తించినట్టుగా అనిపించింది.
ఒక రచయితకు లభించే ప్రతి గౌరవం అతని లేదా ఆమె ప్రయాణానికి ఒక మైలురాయి. కానీ కొన్ని గౌరవాలు మాత్రం ముందుకు వెళ్లాల్సిన దారిని కూడా గుర్తు చేస్తాయి. నాకు ఆగస్టు 29న లభించిన ఈ ప్రభుత్వ సత్కారం అలాంటిదే.
ఈ గౌరవాన్ని నేను ఒక ముగింపుగా కాదు.. మరింత బాధ్యతగా రాయాల్సిన కొత్త ఆరంభంగా తీసుకుంటున్నాను.
ధన్యవాదాలు
శైలజా మిత్ర 1966, జనవరి 15 వ తారీఖున చిన్నగొట్టిగల్లు గ్రామం, చిత్తూరు జిల్లాలో జన్మించారు. వీరు ఎం.ఏ. తెలుగు (ఉస్మానియా విశ్వవిద్యాలయం), ఆంగ్లంలో ఎం.ఏ. (వెంకటేశ్వర విశ్వవిద్యాలయం) తిరుపతిలో, జర్నలిజం (రచన జర్నలిజం కాలేజీ, హైదరాబాద్‌లో పీజీ డిప్లొమా చేసారు. నేటినిజం అనే డైలీ పత్రికలో స్టాఫ్ రిపోర్టర్ గా దాదాపు 10 సంవత్సరాలు; అల్ ఇండియా రేడియో, ఎఫ్.ఎం.లో డీఈవోగా 3 సంవత్సరాలు, వెలుగు పత్రికలో అడ్మినిస్ట్రేటర్‌గా ఐదు సంవత్సరాలు పనిచేసారు. ప్రస్తుతం విమల సాహితి వెబ్ పత్రిక ప్రధాన సంపాదకులుగా వ్యవహరిస్తున్నారు.
వీరి సాహితీ జీవితం 1995లో ప్రారంభమైంది. ఇప్పటివరకు 11 కవితా సంపుటాలు, 4 కథా సంపుటాలు, 4 నవలలు, 12 అనువాదాలు రచించారు. 775 పుస్తక సమీక్షలు, 29 భక్తి–సామాజిక వ్యాసాలు, 11 ఇంటర్వ్యూలు, భావతరంగిణిలో 26 సాహితీ లేఖలు ప్రచురించారు. సాహిత్య ప్రస్థానంలో దాదాపు యాభైకి పైగా అవార్డులు అందుకున్న శైలజా మిత్రగారికి ఇటీవల పొట్టి శ్రీరాములు తెలుగు విశ్వవిద్యాలయం ఉత్తమ రచయితగా ‘కీర్తి పురస్కారం’ ప్రదానం చేసింది. ఉత్తమ విమర్శకురాలుగా అమృతలత గారి ‘అపురూప పురస్కారం’ పొందారు. వీరు రచించిన ‘రాతిచిగుళ్ళు’ కవితాసంపుటికి ‘ఉమ్మడిశెట్టి’ మరియు ‘శ్రీశ్రీ’ ఉత్తమగ్రంథ పురస్కారాలు లభించాయి. ఆల్ ఇండియా లాంగ్వేజ్ అండ్ లిటరరీ కాన్ఫరెన్స్ వారు ప్రతిష్ఠాత్మక ‘సాహిత్యశ్రీ’ బిరుదు ప్రదానం చేశారు.