[శ్రీ పెద్దాడ సత్యప్రసాద్ రచించిన ‘ఒంటరివి కాదు’ అనే కవితని పాఠకులకి అందిస్తున్నాము.]
ఒంటరి అని బెంగేలా
భయమేలా
ఎంతటి బలమో
ఆ ఒంటరితనం
ఒక్కటిగా వుంచుతుంది
నీపై నీకు మక్కువ పెంచుతుంది
అక్కున చేర్చుకుని
చక్కటి ఓదార్పు ఇస్తుంది
దిక్కులకు అవతల కూడా
నీ గొంతే వినిపిస్తుంది
మొక్కవోని ధైర్యాన్నిచ్చి
మొక్కులన్నీ తీరుస్తుంది
కావలిస్తే అడుగు
ఆ ఒక్క సూర్యున్ని
ఈ పక్క చంద్రున్ని
ఒకటి ఒంటరి కాదని
కోటానుకోటికి సాటి అని
పదే పదే చెబుతాయి
ఇదే ఇదే వినమంటాయి
పెద్దాడ సత్యప్రసాద్ విశాఖపట్నం జిల్లా వాస్తవ్యులు, కవిగా, రచయితగా దశాబ్దాల ప్రయాణం. వీరి కధలు, కవితలు వివిధ పత్రికలలో ప్రచురితమవడమే కాక, ఆకాశవాణి విశాఖపట్నం కేంద్రం ద్వారా కూడా ప్రసారం అయ్యాయి. ఇక, వృత్తిగతంగా పాత్రికేయులు. రెండున్నర దశాబ్దాలకు పైగా పాత్రికేయ వృత్తిలో అంకితభావంతో పనిచేస్తున్నారు. రాజకీయ విశ్లేషణలు వీరి ప్రత్యేకత. ప్రస్తుతం ఆకాశవాణి విశాఖపట్నం ప్రాంతీయ వార్తా విభాగంలో న్యూస్ ఎడిటర్గా పనిచేస్తున్నారు.