[ప్రభుత్వ హోమియో మెడికల్ ఆఫీసర్ డా. కె. ఉమాదేవి గారు అందిస్తున్న ఫీచర్ – ‘ప్రకృతి వనరులతో హోమియో వైద్యం’.]
హోమియో మందులు-58. లెడం పాల్ (Ledum Pal)
మార్ష్ టీగా పిలవబడే వృక్షజాతికి చెందిన మొక్కనుండి ఔషధ గుణాల్ని రాబట్టిన వారు డా॥ హానిమన్.
స్థానాలు:
ఈ మందుకి చర్మం, జాయింట్స్, జిగురుపొరలపై ప్రభావం ఎక్కువ.
వ్యాధులు:
ఇది చర్మవ్యాధులు, కీళ్ళ నొప్ప్పులకు ఉపయోగపడుతుంది.
పోలికలు:
రూటా, హెమమెల్లిస్, బెల్లిస్, ఆర్నికా, హైపరికం, ఎఖినేషియా, నేట్రం మూర్ మందులతో దీనిని పోల్చవచ్చు.
విరుగుళ్ళు:
కాంఫర్ దీనికి విరుగుడుగా పనిచేస్తుంది. చైనా, ఆల్కహాల్, తేనెటీగలు కుట్టుట వల్ల కలిగే దోషాలకిది విరుగుడు.
కారణాలు:
విషజాతి పురుగులు, జంతువులు కరిచిన, దోమలు కుట్టిన, మేకులు, కత్తి వల్ల కలిగే గాయాల వల్ల వ్యాధులు వస్తాయి.
ఉద్రేకం:
వీరికి రాత్రి, పడక వేడిమి వల్ల వ్యాధి లక్షణాలు ఉద్రేకిస్తాయి.
ఉపశమనం:
వీరికి చల్లదనం వల్ల, చల్లని నీటిలో కాళ్ళు ఉంచుట వల్ల ఉపశమనం ఉంటుంది.
మయాజమ్:
సిఫిలిస్ మయాజమ్ కలిగిన మందు. రుమాటిక్ డయాథిసిస్.
మోతాదు:
3-200 పొటెన్సీలో దీన్ని వాడవచ్చు.
కాలపరిమితి:
3-4 వారాలుంటుంది.
మానసిక లక్షణాలు:
అతికోపం, తోటివారి మీద అసహ్యత చెందడం, ఒంటరిగా ఉండాలనుకోవడం వంటి మానసిక లక్షణాలున్నవారికిది మంచి మందు.
శారీరిక లక్షణాలు:
తల:
నడుస్తున్నప్ప్పుడు వికారంగా ఉండి, ఒకవైపుకు తూలిపోతున్నట్లు ఉంటుంది.
ముక్కు:
ముక్కునుండి రక్తం స్రవిస్తుంది.
కండ్లు:
కంటిగాయాలవల్ల దుర్వాసనతో కూడిన రసి కారుతుంది. కాటరాక్ట్‌కిది మంచి మందు.
ముఖం:
నుదురు మీద, మెడల మీద ఎర్రని పొక్కులు, మొటిమలుండి ముట్టుకొన్న ఎడల ముండ్లు గ్రుచ్చుకొనినట్లు బాధగా ఉంటుంది.
జీర్ణకోశం:
అతి కొంచెం భోజనం చేసినా, జీర్ణకోశంలో బరువుగా ఉండి విపరీతమైన బాధగా ఉంటుంది. కడుపునొప్పితో జిగట విరేచనాలు, మలబద్దకం ఉండి మంటతో కూడిన మొలలుంటాయి. ఆసనంలో పుండ్లు పడతాయి. తరచు అపానవాయువులు రావడం వుంటుంది.
ఉదయాన, రాత్రి విడిచి విడిచి వచ్చు దగ్గు వల్ల ఊపిరాడకపోవుట. కోరింత దగ్గు దగ్గినప్ప్పుడు రక్తజీరతో ఉండే కఫం పడుతుంది.
పాదాలలో, కాళ్ళ పొడవునా కీళ్ళ సంధులలో, భుజాలలో నొక్కుచున్నట్లుండే నొప్పి. చీలమండల వాపు, అరికాళ్ళలో మంటలు, చీలమండలో తరచూ బెణుకు, పాదాలనుండి మోకాళ్ళ వరకు వాపులుంటాయి. పాదాలలో కాలిపొడవునా నొప్పులుంటాయి.
తలమీద, చర్మం మీద, ముఖం మీద, పొక్కులు. పాదాలు, చీలమండలు దురదగా ఉండి గోకిన ఎడల బాధ ఎక్కువవుతుంది. గాయాలు తగిలిన ప్రదేశాలు నల్లబడి వుంటాయి.
శరీరం చల్లగా, చల్లని నీరు చల్లినట్లుండుట. ముఖం మాత్రం వెచ్చగా ఉంటుంది.
ఇలాంటివారికిది సూచించదగ్గ మందు.
(మళ్ళీ కలుద్దాం)
వృత్తిరీత్యా ప్రభుత్వ హోమియో వైద్యురాలైన డా. కొప్పెర్ల ఉమాదేవి ప్రవృత్తి రీత్యా రచయిత్రి. వీరు 22.6.1965 న కర్నూలులో జన్మించారు. ప్రాథమిక విద్య కర్నూలు లోను, హైస్కూలు విద్య – కదిరి, శ్రీకాళహస్తి లోనూ, ఇంటర్ డోన్ లోనూ, బి. హెచ్. ఎం. ఎస్ – కడప లోనూ పూర్తి చేశారు.
ప్రసిద్ధ కథ, నవల, నాటక రచయిత డా॥ వి.ఆర్. రాసానితో 5.11.1989 న వివాహం జరిగింది యశ్వంత్ కుమార్ (USA), కాంచన్ కృష్ణ పిల్లలు.
వీరివి కొన్ని కవితలు, కథలు, 1500 దాకా వైద్యపరమైన వ్యాసాలు పలు పత్రికల్లో ముద్రింపబడ్డాయి.
ఆంధ్రజ్యోతి ఆదివారంలో, 1998 జులై నుంచి నవంబర్ వరకు ‘స్త్రీ శరీర విజ్ఞానం’, వార్త దినపత్రికలో 1996 నుంచి నేటివరకు ప్రతి సోమవారం ‘హెల్త్ కాలమ్’, విశాలాంధ్ర – ఆదివారంలో 2017 నుంచి 2020 వరకు ‘ఆరోగ్యం’, 1993 నుంచి 1995 వరకు ప్రముఖ మాసపత్రికలో ‘హెల్త్ కాలమ్’ నిర్వహించారు.
1997-1998 మధ్య తిరుపతి రేడియో కేంద్రం నుంచి ‘యవ్వన సౌరభం’ శీర్షికతో ధారావాహిక ప్రసంగాలు చేశారు.
స్త్రీల వ్యాధులు – హోమియో వైద్యం (1996, 2000), స్త్రీ శరీర విజ్ఞానం (2000), హోమియో వైద్యం – సాధారణ వ్యాధులు (2003), హోమియో వైద్యం (2011), ఇన్ఫెక్షన్స్ (2016), పిల్లల పెంపకం (2017), కరోనా – నివారణ (2021) అనే పుస్తకాలు వెలువరించారు.