[శ్రీ మరింగంటి శ్రీకాంత్ రచించిన ‘పుస్తకం..!!’ అనే కవితని పాఠకులకు అందిస్తున్నాము.]
1
శరీర పటుత్వానికి వ్యాయామమెంత అవసరమో
మానసిక ఆరోగ్యానికీ అంతే ప్రాముఖ్యం
మనిషి మూర్తిమత్వానికి,విశ్వాసానికి
మనుగడలో పఠనం ఒక వ్యాయామమే
2
వజ్రాన్ని సానబడితే దగధ్ధగాయమానంగ మెరసినట్లు
మస్తిష్కాన్ని మథిస్తే
మహోజ్వలిత విజ్ఞానం సొంతమవుతుంది
సానబడితే వజ్రం మెరసినట్లు
పుస్తక పఠనంతో సమాజంలో వజ్రంలా మెరవవచ్చు..
3
హస్త భూషణంగా పుస్తకం మహనీయుల చేతుల్లో
ప్రత్యక్ష సాక్షులుగా వీక్షిస్తున్నాం ప్రధాన కూడళ్లలో
చిరిగిన చొక్కా అయినా ఫరవాలేదు కానీ
ఓ మంచి పుస్తకాన్ని కొనుక్కో కందుకూరి మాటలు చర్వితచరణం
4
మనిషిని ఉన్నతంగా ఉంచేదే పుస్తకం
పుస్తకాలు లేని ఇల్లు కిటికీలు లేకుండా నిర్మించుకున్నదే
ప్రతీ బాల్యం సరస్వతీ నమస్తుభ్యమని
అక్షర శ్రీకారంలో అమ్మ ఆశీస్సులు పొందాల్సిందే..
శ్రీ మరింగంటి శ్రీకాంత్ గారిది రాజన్న సిరిసిల్లా జిల్లా. తండ్రి గారు రఘరామాచార్యులు.
శ్రీకాంత్ గారి కవితలు పలు పత్రికలలో ప్రచురితమయ్యాయి.