[సత్యగౌరి మోగంటి గారు రచించిన ‘సజీవ సాక్ష్యం’ అనే కవిత పాఠకులకి అందిస్తున్నాము.]
ఆకాశం ఒక ప్రశ్న
సముద్రం ఒక జవాబు
మధ్యలో ఈ గాలి హోరు
తీరని జీవితంలా!
ఇక్కడ నిర్మలత నటిస్తోంది
అక్కడ బీభత్సం నిజం చెబుతోంది
లోపల కూడా అంతే..
పైన పౌర్ణమి, లోపల తుఫాను!
వర్ష ఋతువు వెళ్లిపోతున్న శబ్దమా?
శరత్ను మోసుకొస్తున్న కాలం శబ్దమా?
ఆశ్వయుజమేమో ఆకులు రాల్చదు
కానీ మనుషుల ముసుగులు రాలుస్తుంది.
ఈరోజు నిండు పున్నమి
వయసు మీద పడే వెన్నెల..
ఇది వెలుగా? లేక
నీడల్ని సైతం చూపించే మిణుగురు కాంతా?
గాలి ఆగదు
నేను ఆగను
పౌర్ణమి వస్తుంది పోతుంది..
ఆకు రాలితే కొమ్మ మళ్లీ చిగురిస్తుంది
ముసుగు రాలితేనే మనిషి నిజమవుతాడు
చివరకు మిగిలేది ఈ హోరు మాత్రమే
నేనున్నాననడానికి సజీవ సాక్ష్యం
కవయిత్రి సత్యగౌరి మోగంటి వృత్తి రీత్యా ఉపాధ్యాయురాలు. ఎమ్.ఎ; బి.ఎడ్, బి.ఎల్. చదువుకున్నారు. కాకినాడకు చెందిన వీరు ప్రభుత్వ పాఠశాలలో స్కూల్ అసిస్టెంట్గా పదవీ విరమణ చేశారు. తెలుగు సాహిత్యం లోనూ, రచనావ్యాసంగంలోను అభిరుచి వున్న శ్రీమతి సత్యగౌరి, రేడియో ప్రసంగాలు, అడపాదడాపా వివిధ ప్రక్రియల్లో రచనా వ్యాసంగం చేస్తూ ప్రస్తుతం హైదరాబాదులో విశ్రాంత జీవితం గడుపుతున్నారు.
