[శ్రీ కనపర్తి రాజశేఖరమ్ రచించిన ‘సంతకం ముద్ర’ అనే కవితని పాఠకులకు అందిస్తున్నాము.]
సంతకంలో
ఎంత పెద్ద పేరైన
చిరు అక్షరాలుగా
ఇమిడి పోవలసిందే
ముద్రలో
ఎంత గొప్ప హోదా ఉన్న
సూక్ష్మ అక్షరాలుగా
ఒదిగి పోవలసిందే
సంతకానిది ముద్రది
జగమెరిగిన బంధం
ఏ శక్తి కూడా
వాటిని విడదీయలేదు
ఆ జంటది
అవినాభావ సంబంధం
ఆ రెంటిది
అద్వితీయ అనుబంధం
అన్యోన్యంగా
రెండూ ఒకటిగా
పరస్పరం జీవిస్తున్న
సంతకం ముద్ర ద్వయం
