స్ఫూర్తి కిరీటం అంబేద్కర్!

[శిరీష పద్మ యర్రంశెట్టి గారు రచించిన ‘స్ఫూర్తి కిరీటం అంబేద్కర్!’ అనే కవితని పాఠకులకి అందిస్తున్నాము.]

నిశ్శబ్ద గర్భంలో శిఖరమై అవతరించిన శక్తి
మానవ గౌరవానికి మహోన్నత ప్రతీక!
డాక్టర్ బాబా సాహెబ్ అంబేద్కర్
పేదరికపు పొగమంచును ఛేదించి,
వివక్షలు విరుచుకుపడిన కాలాన్ని జయించి,
జ్ఞానజ్యోతిగా జాతి చైతన్యాన్ని మేల్కొలిపిన మహామానవుడు!

అవకాశాల కంటే అడ్డంకులే అధికమైన యుగంలో,
అవమానాలే అనుభవాలైన బాల్యంలో..
సంకల్పమే శస్త్రమై,
విద్యనే విముక్తి మార్గమని విశ్వసించిన ధైర్యవంతుడు!

విశ్వ విద్యా ప్రాంగణాల్లో విహరించి,
కొలంబియా విశ్వవిద్యాలయంలో విజ్ఞాన విహంగమై ఎగిసి,
లండన్ స్కూల్ ఆఫ్ ఎకనామిక్స్ లో ఆలోచనలకు ఆవిష్కరణ ఇచ్చి..
పట్టాల పరిమితిని దాటి,
పరిపక్వ దృష్టితో ప్రపంచాన్ని దర్శించిన జ్ఞానస్వరూపం!

విద్య-సంఘర్షణ-వ్యవస్థీకరణ అనే త్రిసూత్రంతో
సమాజంలో ఆత్మగౌరవ దీప్తి నింపి,
నిశ్శబ్దాన్ని స్వరంగా మలిచి
న్యాయ మార్గాన్ని ప్రతిష్ఠించిన మార్గదర్శి!

స్వాతంత్ర్య సంధ్యలో దేశం ఎదురు చూసిన వేళ..
న్యాయం అనే నూతన ధర్మాన్ని స్థాపించిన దార్శనికుడు!
భారత రాజ్యాంగ రూపకల్పనలో
సహచర శిల్పులతో కలసి
సమానత్వానికి అచంచల పునాది, స్వేచ్ఛకు
శాశ్వత స్వరూపం ఇచ్చిన మహనీయుడు!

ఆ శాసనంలోని ప్రతి భావం..
మానవతకు మౌలిక మంత్రం,
ప్రతి ప్రాధమిక హక్కు..
గౌరవంతో జీవించే గరిమా గీతం!

ఈ రోజు మనం అనుభవిస్తున్న
హక్కులు జీవించే హక్కు, ఆలోచించే స్వేచ్ఛ,
వృత్తిని ఎంచుకునే స్వాధీనం, గౌరవ జీవనం,
శుభ్రమైన పరిసరాల్లో శ్వాసించే అవకాశం..
ఇవి అన్నీ ఆయన దూరదృష్టి ఫలితాలు!

చట్టరంగానికి దిశానిర్దేశం చేసి,
సంస్కరణలతో సమాజాన్ని శుద్ధి చేస్తూ..
అన్యాయంపై అగ్నిపర్వతంలా ఎగిసి
న్యాయానికి నిత్య దీపస్తంభంగా నిలిచిన మహామేధావి!

తన జీవితం – ఒక ప్రేరణ యాత్ర,
తన ఆలోచనలు.. ఒక శాశ్వత దర్శనం,
తన కృషి – సమానత్వ భారతానికి శాశ్వత పునాది!

అంబేద్కర్ అనేది కేవలం పేరు కాదు..
మానవతా ధర్మానికి నిర్వచనం,
సమానత్వానికి నిశ్చయం,
స్వాభిమానానికి శాశ్వత జ్యోతి!

జాతి మస్తకంపై మెరిసే
స్ఫూర్తి కిరీటం.. అంబేద్కర్!

ప్రగతికి పేదరికం అడ్డంకి కాదని నిరూపించిన నడక,
విద్యతో విధిని మార్చగలమనే సత్యం,
త్యాగంతో తరాల్ని తీర్చిదిద్దగలమనే విశ్వాసం..
అదే అంబేద్కర్ జీవన గాథ..
అదే భారతానికి శాశ్వత మార్గదర్శకం!