[శ్రీ రాచకుళ్ల విశ్వరూప చారి రచించిన ‘తందనాలు’ అనే చిన్న కవితలని పాఠకులకు అందిస్తున్నాము.]
201
ఆరు బంగారమేగా
కోరుకుందురు అందరూ ఈ అంకెనే
తరుణులందరి ఆరవ ప్రాణం భర్తేగా
ఆరనే అంకె అన్ని విధాలా మంచిదనే భావన
202
ఏడు ఏడ్పు అంటారు అందరూ
ఏడు అడుగులు ఎలా పనికి వచ్చాయో పెళ్ళిలో
ఏడు అడుగులతో ప్రారంభమై
కడ దాక నడవ వలసిందేగా
203
ఎనిమిది కూడా ముఖ్యమైనదే
కాని పనులేమీ వుండవు ఈ అంకెతో
కొని తెచ్చుకునే నమ్మకాలూ తప్ప
కాన ఈ అంకె గూడా మహదానందమేగా
204
తొమ్మిది అన్నిటికన్నా ముఖ్యమైనది
నమ్మి ప్రారంభించ వచ్చు ఈ అంకెతో
తమ తమ జాతకాలు ఈ అంకెతో ముడి పడి ఉండవచ్చు
నమ్మకం ముఖ్యం
205
అన్ని అంకెలు మంచివే
కొన్నిమంచివి కాదనే ఆలోచనే తప్పు
అన్నిటికి దేని విలువ దానికే ఉంటుంది
అన్నిటితోనే అన్ని పనులు అవుతై
206
మరు జన్మ వున్నదో లేదో
మరు జన్మంటే వాళ్ళ పిల్లలే గదా
తరువాత వాళ్ళ పిల్లల పిల్లలు మరు జన్మే
పరంపర ఆ విధంగా సాగుతుంది
207
నిర్భీతి జీవితం యెంతో ఆనందం
కోరకుండానే బలం వచ్చు
కరుడు గట్టిన పనులైనా అలవోకగా సాధించవచ్చు
నిరాటంకంగా జీవితం సాగు
208
కోరుకున్నంతనే దేవుడు వరాలిస్తే
చేరుకోరు పనులు చేయుటకు
పరుల సొమ్ముకు ఆశించరు నరులు అందరూ
తిని, త్రాగి మత్తులో వుందురు
209
దేవుడే అన్నీ నియంత్రించిన నాడు
కావు ఇన్ని ఘోరాలు, నేరాలు ఇలలో
శవ రాజకీయాలిన్ని వుండవు
రావు ఇన్ని కేసులు పోలీసుల చెంతకు
210
పని చేయుటే ధ్యేయంగా
కాని పనులు చేయకుండుట
లేని పోని నిందలు ఇతరులపై రుద్దకుండుట
హాని చేయ కుండుటే మానవ లక్ష్యం కావాలి
శ్రీ రాచకుళ్ల విశ్వరూప చారి (ఆర్.వి. చారి) గారిది తెనాలి. ప్రసుతం హైద్రాబాదులో సెటిల్ అయినారు.
చారి గారు ఈ.ఎస్.ఐ. కార్పొరేషన్‌లో సూపరింటెండెంట్‌గా పనిచేసి రిటైర్ అయినారు. వారి మేనమామ గారు కీ.శే. పూసపాటి నాగేశ్వర రావు. అయన వీరబ్రహ్మేంద్ర చరిత్ర పద్య కావ్యం రచించి యున్నారు. కాగా అయన అష్టావధాని కూడా. వారి స్వగ్రామము రావెల్, గుంటూరు జిల్లా. చారి గారికి తమ మామయ్య మాదిరి పద్యాలు వ్రాయాలని కోరిక. కానీ ఛందస్సు తెలిసుండాలిగా. అందుచే వ్రాయలేక పోయారు.
కానీ నానీలు వ్రాయుటకు వారి కుమార్తె శ్రీమతి ప్రత్తిపాటి సుభాషిణి కారణం. ఆమెది బాపట్ల, గుంటూరు జిల్లా. టీచర్‌గా పని చేస్తున్నారు. వారు ఈ మధ్యనే ఒకానొక సంధర్బములో హైదరాబాద్ వొచ్చి తాను రచించిన ‘నిశ్శబ్ద పర్జన్యాలు’ చారిగారికి ఇచ్చారు. అవి చాలా బాగున్నాయి. అవి చదివిన తరువాత, ఆ స్పూర్తితో, నానీలు వ్రాయాలని కోరికతో చారిగారు నానీలు వ్రాసారు. పద్యాలు వ్రాయాలనే వారి కోరిక ఈ విధంగా తీరుచున్నది.