తెలుగులో ‘మంకుతిమ్మన కగ్గ’-33

[కన్నడంలో శ్రీ డి.వి.జి. రచించిన ‘మంకుతిమ్మన కగ్గ’ను తెలుగులోకి అనువదించి అందిస్తున్నారు శ్రీ కల్లూరు జానకిరామరావు.]

~
321.
భూనభోమండలముల పరిధికి మించిన జీవన పరి
పూర్ణ దర్శన మొకటున్నది యాహింపింపగా దేవ
మానవ పశుపక్షి సంఘంబు లెల్ల నర్తించునచట
మనోనేత్రాన దర్శింపు మా చిత్రమును – మంకుతిమ్మ!

322.
ఆ విశ్వరూప సందర్శనమునకు చెందియున్నవి
జీవ నిర్జీవములు క్రమానుగత యాదృచ్ఛిక
అవశ్య వశ్య స్వాచ్ఛంద్య నిర్బంధములు
కైవల్య దృష్టి యది – మంకుతిమ్మ!

323.
సార సుఖ రసనిధియై యా పరబ్రహ్మ యుండగా
స్వారస్యహీన మీ జీవనమనదగునే నెవరికైన
పౌరుష ప్రేమ సౌందర్యంబులును యంతియే – దాని దెలియు
స్వారస్యమది రహస్యము – మంకుతిమ్మ!

324.
ఏది సత్యమైనను, యదేమి యసత్యమైనను, ‘నే’ నను
నది యనుభవైక వేద్యము, యయ్యాత్మకు సరి
కాదు చెఱుపు సేయ నెవ్వరికేని
సదా ధ్యానింపు మాత్మగతిని – మంకుతిమ్మ!

325
మర యంత్రంబుల నెన్నింటినో బడి, ఎన్నో మిశ్రణాల
మరెన్నో యాది భూతాల గలసి పరిపక్వమొంది
పరిపరి విధముల పరిణతి చెందిన ఈ
నరుడు నేడధివసించె సృష్టి శిఖరాగ్రాన – మంకుతిమ్మ!

326.
ఊరక నుండ నోపక తనకొక ఆడ జోడునున్
సరియొనరించుకొని మాయాంగనన్ గలసి
మరియొక జగజ్జాలంబున విహరించుచున్న
పరమాత్ముడి బొమ్మలాట యిది తెలియర – మంకుతిమ్మ!

327.
లోకము నడుచు తీరెట్లనిన, మూడు ముక్కల యాట పగిది,
ఒకరు కాదు మువ్వురు, దైవ పురుష పూర్వజన్మ వాసనలు,
ముక్కలు చెదరగ మరల కలుపుచు నాడుచుందురు – పేక
ముక్కలే మనమందరము – మంకుతిమ్మ!

328.
పేకముక్కల నన్నింట సరికట్టియుంచు సృష్టి, ఏ
పేక లెవరి చేత జిక్కునో ఎవరికెరుక? ఏ
పేక ముక్క ఏ దిక్కున జేరునో, ఎవ్వడికుపయోగపడునో? తెలి
యక సతమతమై పోవుటే మన వంతు – మంకుతిమ్మ!

329.
ఆద్యంతములే లేక నడచి పోవుచున్నదీ యాట నిలువక
అందే గడచి పోవుచున్నవి మన జన్మము లన్నియున్
ఇందు గెలుపెవ్వరికో, ఓటమి ఎవ్వరికో, లెక్కలు తేల్చుటెప్పుడో
ఇందు ఆడిన యాటయే లాభము – మంకుతిమ్మ!

330.
ఇక ఫలిత మదేమి నీ యాటకనిన, కౌతుక రుచియే ఫలితము
పేక ముక్క యది క్రిందబడకున్న యాట సాగునే? మరల
ఇక గెలుపెవరిది, ఓటమి ఎవరిదని యడుగట వ్యర్థము; విడు
వక కొనసాగవలయు నియ్యాట – మంకుతిమ్మ!

(ఇంకా ఉంది)