తెలుగులో ‘మంకుతిమ్మన కగ్గ’-73

[కన్నడంలో శ్రీ డి.వి.జి. రచించిన ‘మంకుతిమ్మన కగ్గ’ను తెలుగులోకి అనువదించి అందిస్తున్నారు శ్రీ కల్లూరు జానకిరామరావు.]

~

731.
దేనినో కంటన్ గను, మరిదేనినో గని బెదరు
దేనినో దలంచి తుర్రుమని పారు, గగ
నాన, విహరించు విహంగమున కియ్యది నిత్యానుభవము
మన జీవనమును ఎక్కుడుగ లేదు – మంకుతిమ్మ!

732.
ఏఏ దిక్కునకున్ బోవునో, ఏ దిక్కునకు దారి మళ్లించునో!
ఏఏ వేళన నే దిక్కునకో తన పయనము విహంగమునకు;
ఏఏ సమయంబున మన జీవనగతి మారునో; అనూహ్యము
వేయేల జెప్ప! విధి కీలుబొమ్మలమే మనము – మంకుతిమ్మ!

733.
మావి మొలక నాటి వేము దినగ సిద్ధముగ నుండు;
భూ విశేషత చేత రుచులు మార్పులు చెందగవచ్చు,
ఆ వివరములన్నియు నీకేల? తోట యజమానివా నీవు?
సేవకుండవు నీవంతియె; – మంకుతిమ్మ!

734.
సైనికుడవు నీవు; సైన్యాధ్యక్షు డెచటనో యుండు,
ఆనతిచ్చు నాతండు, పాలించుటే నీ వంతు;
ఘనతను పోరాడుము, గెలుపోటముల నెంచక
కానిపించని యాజ్ఞ యిది – మంకుతిమ్మ!

735.
రణ జయాపజయంబు లరయ సేనాధిపతికె చెల్లు;
రణ శిక్షణానుభమే లాభము భటునకు; నద్దాని నాతడు
గణనీయంబుగ తన సత్త్వ వికసనం బొనరించుకొను;
ఎన్నగ యాతడి శ్రేయస్సునకు సోపానమది – మంకుతిమ్మ!

736.
విధిని నిర్వహించుచు, మదిని సంతసింప జేయుచు
వేదనల పాల్జేయక యంతరాత్మను, యుద్వేగంబు లేక,
విధి మాయలకున్ లోబడక, విధాతన్ మది దలచుచు
వేదన చెందక సాగింపుము జీవనము – మంకుతిమ్మ!

737.
ఎందైన నీ పూర్వ జన్మ ఋణంబుల లెక్కలు దీర్చవెంచితివేని
ఇందే మొదలిడుము దాటవేయక ముందునకు,
అందించు మితరులకు నీ హృదయ స్పందనము
పొందుగ సాగించుము జీవనము – మంకుతిమ్మ!

738.
తనకున్ లభ్యంబు కాని యశస్సు, తనయునకున్ లభించిన
జనకుండది తనకె లభించెనని సంతసించు తెఱంగున;
జనులకేయే సుఖంబులవి గల్గిన, యవి తనకాయెనని
తనివి జెందు జ్ఞాని – మంకుతిమ్మ!

739.
తన మనోచంచలతలన్ గని తాను నవ్వుకొనుచు
తనలో నెలసిన ద్వంద్వంబుల గుట్టెరిగి మసలుచు
తన చిన్మాత్మ చైతన్యంబున్ వేరుగ నుంచు వాడు చతుర
మానవుండరయ వాడే ధన్యజీవి – మంకుతిమ్మ!

740.
జీవనమది యొక కళ; దాని నేర్పించుటెట్లు? వేన వేల
యవకాశంబు లుపాయంబులు నీతి నియమ యుక్తులున్నను
కావవన్నియు సరి; యందొక్కటే చేకూర్చు విజయంబు
ఆ వివరము లున్నవి నీలోన – మంకుతిమ్మ!

(ఇంకా ఉంది)