[కన్నడంలో శ్రీ డి.వి.జి. రచించిన ‘మంకుతిమ్మన కగ్గ’ను తెలుగులోకి అనువదించి అందిస్తున్నారు శ్రీ కల్లూరు జానకిరామరావు.]
~
741.
నిండుకుండ తలపై మోసి, చురకత్తిని చేతబట్టి, దొమ్మ
రీడు, తూగాడు పగ్గంబుపై నడయాడు నటునిటు కౌశలంబు
తోడ, తడబడక, క్రిందికిన్ బడక: మనమున్ యనుసరించవలె
వాడి కుశలత, జీవనము సాగింప – మంకుతిమ్మ!
742.
జీవనంపు భారమున్ తగ్గించి, మోయ సులభతరంబు జేయ
కావలె, సహన సమరసా భావంబు లంతః పరీక్షలె గాని; బహు
ధీ విద్యలు, తర్కంబులు, బహు నేమంబుల్ గాదు; యయ్యవి
కావలె హితంబులైన విషయంబులాత్మకున్ – మంకుతిమ్మ!
743.
అన్నియుం నశించు, కాలవశంబగు; కాలపురుష నెదుట
యందరున్ అల్పులే; సంతోష సల్లాప ఉల్లాసంబులే ధర్మమరయ!
అంత మొందించువాడె నుద్ధరించు మరల మరల; ఎండివాడిన
తృణం బది పునః చిగురించదే – మంకుతిమ్మ!
744.
గ్రీష్మంబున యణగి యుండి, వర్షఋతువున యంతటన్
భీమంబుగు, మిట్టపల్లముల, కొండ కోనల చిగురించి, తంపుజేసి
విశేషంబున పశువులకు అశనమై, పృథికాహ్లాదంబున్ గూర్చునట్టి
అశేష గుణంబులున్న తృణము, సాధువు గాదె – మంకుతిమ్మ!
745.
పరహితంబు గోరెడిమాట యటుండనిమ్ము; పరభాగ్యోప జీవియే
నరుడు జంతు పశు, పక్షి, కీటక, మీనంబుల వోలె; తరులవి
పరుల కుపకరించు; నవి అనాపేక్షిత పుణ్యజీవులు;
నరుడే యపాయకారి ప్రకృతికి – మంకుతిమ్మ!
746
నీడ నొసంగి, తరువు తన చెంతను జేరిన బాటసారుల
బడలిక దీర్చి, వారి మరుప్రయాణంబునకు వీలు కల్పించు;
వేడదది ప్రతిఫలము; నీవును, ఇంటన్, బయటన్ తరువై
కడు చరించిన యదియ పరమ ధర్మము – మంకుతిమ్మ!
747.
వారెంతటి ధనవంతులో! అబ్బో! వీరెంతటి బలవంతులో!
వారెంతటి యశోవంతులో యనెడి ఈ సునసూయ లేల?
ఏరి కెంత శివుడ నుగ్రహించినంత తనివి జెందవలె గాని
ఆరడి జేసిన పరమాత్మన కింపగునేయది – మంకుతిమ్మ!
748.
అన్నంబు నారగించునెడ ప్రశ్నించుకొనుము, దాని నుడికించిన
యన్నీరంబేది యని? నీ శ్రమంపు స్వేదమో! ఇతురుల కన్నీరో!
అన్యులకు నీవెంత ఇచ్చితివో, అంతియే నీ యన్నంపు బుణము
అన్యథా యది జీర్ణించని ఋణశేషము – మంకుతిమ్మ!
749.
మూలధనం బదేది ఈ జీవిత వ్యాపారంబున లాభంబు గడింప
మూలధనం బది తత్త్వదృష్టి; జగదాత్మ లీలా విహారసుఖమే
మేలుగు చిరలాభంబు; ధరన్ యనుభవించు సుఖమే
అల లభించు వడ్డి – మంకుతిమ్మ!
750.
ఈదులాడుము జీవనంపుటలలపై తేలియాడి; మునుగక;
ఏది మంచి చేయు నద్దాని నితురలకిచ్చి నీవును సంతసింపుము;
మదిన కలత జెందక ముందుకు సాగిపొమ్ము; హాయిగ మనుమున్నంత కాలము
వ్యథ జెందక తరలుము పిలుపు వచ్చిన తరి – మంకుతిమ్మ!
(ఇంకా ఉంది)
శ్రీ కల్లూరు జానకిరామరావు రచయిత అనువాదకులు. వీరి తండ్రి కీ.శే. కల్లూరు అహోబళరావు ప్రముఖ కవి, బహు గ్రంథకర్త. కృష్ణదేవరాయ గ్రంథమాల వ్యవస్థాపకులు. తల్లి కీ.శే. సీతమ్మ గారు.
జానకి రామరావు గారి భార్య కీ.శే. సుభద్రమ్మ. ఇద్దరు కుమారులు, ఇద్దరు కుమార్తెలు సంతానం.
వీరి పుట్టిన తేదీ: 23(15) జూలై 1941. విద్యార్హత: B.A.Bed, M.A.( English)
హిందూపురం ఎంజీఎం హైస్కూల్లో 1964 నుండి 1990 వరకు 26 ఏళ్లు ఉపాధ్యాయుడిగానూ, 1990 నుండి 1999 వరకు ప్రధానోపాధ్యాయులుగా పనిచేసి, పదవీ విరమణ చేశారు.
ప్రస్తుత నివాసం బెంగుళూరు. ఫోన్: 9740849084