[కన్నడంలో శ్రీ డి.వి.జి. రచించిన ‘మంకుతిమ్మన కగ్గ’ను తెలుగులోకి అనువదించి అందిస్తున్నారు శ్రీ కల్లూరు జానకిరామరావు.]
~
871.
ఏరికేది తగినది? ఏరికేది దక్కునో! రహస్యంబది.
అరయన్ సులువగు తెల్సినన్, తెలియునదే సంస్కారము
తారతమ్యంబు తెలియని యెడన్ మనకు తగనిదాని నింకొకడు
చౌర్యంబు సేయుటకు సులువగు – మంకుతిమ్మ!
872.
గుడిస ఇది, ఎండుగడ్డి, పాత మట్టి ఇల్లని ఛీత్కరించి
బడుగు జీవిని కించపరచు కార్యము గొప్పదే?
వారి సుఖ జీవనంబున అశాంతి రేపిన, మరల
బడుగువాడి ఆ ప్రశాంతత మరల రాగలదే – మంకుతిమ్మ!
873.
అలసి సొలసి మైమరచి హాయిగా నిదురించువాని గని
నేలపై యేల, పానుపుపై పరుండుమని వానికదిపిన, నయ్యది
చాల, యుపకారంబు చేసినట్టుగునే? ప్రశాంతత పాడగు,
సులభమేమి కాదు మంచి పనిచేయ – మంకుతిమ్మ!
874.
మట్టి కుండను పగులగొట్టి, నీకిచ్చెద బంగరు కుండ యన్న
గట్టి బంగారంబు నిచ్చు గని ఏదైనను గలదే నీకు? ఎ
ప్పట్టున సంతోషంబు గల్గు నీటిని పారబోసి పాలు తాగమన్న,
ఎట్టైన ఉన్నదే సుఖము నిచ్చు – మంకుతిమ్మ!
875.
బహు ప్రాచీన లోకమిది, బహు పురాతనమైనది
బహు రసంబులన్ సేవించి ఎదిగినదీ లోకము
బహు కష్టతరంబు దీని స్వభావంబున్ మార్చ
సాహసంబు వలదు దీని మార్చ – మంకుతిమ్మ!
876.
ఆనతి నీయగలవే సింధు నదికి, హిమగిరికి వేరొక చందంబున
వెనుదిరిగి ప్రవహించమని; మూఢతనంబు గాదే యది;
జనచైతన్య ప్రవాహమది తన దారిన్ పయనించు, అంధ
తనంబు గాదది – మంకుతిమ్మ!
877.
మతివంతులు లేకుండిరే మనకంటెను మన ముందువారు! జనుల
హితంబున్ కోరరే వారలు, శ్రమించలేదే వారలు,
అతి వైద్యంబు చేత కొత్త రుగ్మతలుదయించునో ఏమో!
మితి యుండవలె నవీకరణంబునకు – మంకుతిమ్మ!
878.
సరిజేసెదనను నెపంబున్ బునాదుల పెకలించనేల?
మరల దానిన్ నిర్మింప నీ తరమే? కౌశలంబు గలదే నీకు?
తరువున్ మరల సరిజేసెదనని వేర్లనూడ బెరుక వెర్రితనమేల?
దురుసుతనమేల మార్పుల జేయ – మంకుతిమ్మ!
879.
మృగ లక్షణంబులు నరులలో ఉన్నంతవరకు తప్పవు కలహంబులు;
పగ కారణంబే కాదు, ఆకలియు హత్యలకు దారితీయించు,
తగరు, కుస్తీ పందెములు, సభావాగ్వివాదములు, అన్నియున్
సొగసైనవే కలహంబులకు – మంకుతిమ్మ!
880.
తన మనోరథంబులు చక్రగతిన్ ఈడేర్చబూను నరుడు,
తన మణిహారంపు ముడి తన కుత్తుకన్ బిగియించునొకతరి,
తన సంకల్పంబులు విపరీతమైన తరి యాతని
వెన్ను విరుగు గాదె – మంకుతిమ్మ!
(ఇంకా ఉంది)
శ్రీ కల్లూరు జానకిరామరావు రచయిత అనువాదకులు. వీరి తండ్రి కీ.శే. కల్లూరు అహోబళరావు ప్రముఖ కవి, బహు గ్రంథకర్త. కృష్ణదేవరాయ గ్రంథమాల వ్యవస్థాపకులు. తల్లి కీ.శే. సీతమ్మ గారు.
జానకి రామరావు గారి భార్య కీ.శే. సుభద్రమ్మ. ఇద్దరు కుమారులు, ఇద్దరు కుమార్తెలు సంతానం.
వీరి పుట్టిన తేదీ: 23(15) జూలై 1941. విద్యార్హత: B.A.Bed, M.A.( English)
హిందూపురం ఎంజీఎం హైస్కూల్లో 1964 నుండి 1990 వరకు 26 ఏళ్లు ఉపాధ్యాయుడిగానూ, 1990 నుండి 1999 వరకు ప్రధానోపాధ్యాయులుగా పనిచేసి, పదవీ విరమణ చేశారు.
ప్రస్తుత నివాసం బెంగుళూరు. ఫోన్: 9740849084
