తెలుగులో ‘మంకుతిమ్మన కగ్గ’-89

[కన్నడంలో శ్రీ డి.వి.జి. రచించిన ‘మంకుతిమ్మన కగ్గ’ను తెలుగులోకి అనువదించి అందిస్తున్నారు శ్రీ కల్లూరు జానకిరామరావు.]

~

891.
జలనిధి జేరు నదులన్ని తమ గుణంబుల వీడి, క్షారమై
కలసినట్లు, నీ గుణంబులును బ్రహ్మంబున లీనమగు;
అల పుణ్యమో! పాపమో, హితమో, అహితమో, ఏదైన
వెలుగొందునవి మేలుగ – మంకుతిమ్మ!

892.
నీలాకాశంపు టావల, విశ్వంబున కవ్వల, సుదూరంబున
నెలసి యున్నాడా? లోన హృత్కుహరంబున మబ్బున
కలసి యున్నాడా పరమాత్మ? నిగూఢమైన ఈ రెంటిని
మేళవించి తెల్సినవాడె జ్ఞాని – మంకుతిమ్మ!

893.
స్వప్నలోక మది కల్లయను జాగృతావస్ధితుడు
సుప్తాస్థుడు జాగృతావస్థను కల్లయను
స్వప్న జాగృతావావస్థలకు నిర్లిప్తంబుగ నుండు
గుప్తంబుగ ఆత్మ, నిజమిది – మంకుతిమ్మ!
(జాగృదావస్థ = మేల్కొన్న స్థితి: సుప్తావస్థ = గాఢ నిద్రాస్థితి)

894.
సూర్యోదయాస్తమానాల కారణంబుగ మనకగు కాల
నిర్ణయంబు: సూర్యుడే లేకుండె నేని
అంత్యమే లేని పరిశుద్ధ బ్రహ్మమ్మే నిండియుండు
లీనమై పొమ్ము నీవు అందున – మంకుతిమ్మ!

895.
సంకేత భావమయ మీ జీవన వ్యాపార మరయ
అంకెల మయమై నిర్వహింపబడుతున్నవి కార్యములు
సంకేతంబుల, అంకెల మూలంబుగ ఏర్పడు సంబంధములు
అంకెలకు, సంకేతములకు మీరినది సత్త్వము – మంకుతిమ్మ!

896.
భౌతిక శాస్త్ర విజ్ఞాన వివరంబులు ఆత్మకేల?
ప్రేత ప్రయాణ కథ వివరంబులు ఆత్మకేల?
జాతి నీతి సమాజ వర్గ భేదముల కథ ఆత్మకేల?
ఆత్మకు లేదు హాని – మంకుతిమ్మ!

897.
శూన్యమే ఎల్లెడల యని యన్న దాని యర్థమేమి?
అన్యమేదియూ లేదను భావమా? ఆ ఆలోచన ఎట్లు కలుగు?
చిన్మయ స్వరూపంబదియని దెల్సి నాశ్రయింపుము
శూన్యవాదమే శూన్య మరయ – మంకుతిమ్మ!

898.
నరనారీ చిత్రంబులు, నాటకపు పాత్రలు
పరిపరి విధముల వేషములు, నానా భాషలు
మరి మరి వచ్చి విస్మయము పుట్టించి మెఱసి కనుమరుగగు
అరయ ఈ లోకమొక జాతర – మంకుతిమ్మ!

899.
మాయా ప్రపంచ మిది, ఇంద్రియ గోచరంబగు నానా విచిత్ర
మాయా కల్పిత రూపంబులన్ చెఱపి నెట్టివేయుమావల,
మాయ తొలగిన తరి గోచరించు నిరాకార పరతత్త్వము
పాయక సారించుము నీ దృష్టి అటువైపు – మంకుతిమ్మ!

900.
తనువు, నల్దిక్కుల నుండి వీచెడి గాలి ఒత్తిడికి గురియైనను
మనసు ఒత్తిడికి గురికాక స్థిరంబుగ నుండు; అచంచలమది
అనువుగ లోకపు భారము ఆత్మకు తెలియకున్న యదియ
మౌని లక్షణము – మంకుతిమ్మ!

(ఇంకా ఉంది)