[ఆగష్టు 29 శ్రీ గిడుగు వెంకట రామమూర్తి జయంతి సందర్భంగా శిరీష పద్మ యర్రంశెట్టి గారు రచించిన ‘వాగమృత వాహిని’ అనే కవితని పాఠకులకి అందిస్తున్నాము.]
వేదాంబుధి గర్భవీచికవై విరిసిన వాణీ!
వీణానినాద మధురిమవై వెలసిన వాణీ!
ఆంధ్రధరా హృదయాంతరాల హంసగతివై
అక్షరజ్యోతి సుధాధారవై సాగు వాణీ!
నన్నయ నాదమున నిత్యనూతన గానమై
తిక్కన తేజమున దివ్యకావ్య ధామమై
పోతన భక్తిరస పావనాంబుధి తరంగమై
వేమన వాక్యమున విశ్వసత్య దీప్తివై!
గ్రంథగిరీంద్ర గుహాంతరాళమున గూఢమై
జనజిహ్వాగ్ర సుధారసమై జాలువారిన
పల్లెపలుకుల పరిమళంబును పద్యముగ
పామర హృదయమున పావనంచేసిన వాణీ!
నుడియందు నిక్షిప్తమైన నూరుయుగాల నాదమై
మాటయందు మానవత్వ మాధుర్యమై
జనజీవన జలధిలో జ్వలితజ్యోతివై
గిడుగు గళమున గర్జించిన జాగృతివై!
శబ్దబంధిత శతద్వార శిలాగృహముల
బంధములను భస్మముచేసిన భాషాతపా!
జనపదాల జలధార జ్ఞానగంగను
జగతి నలుదిక్కుల జలజల పారించిన మహాత్మా!
నీ కలమునుండి జారిన ఒక్క నుడియే
నిద్రించిన జాతి నయనమున నిప్పురవ్వ
నీ భావమునుండి పుట్టిన ఒక్క దీపమే
తెలుగు భవితవ్యపు దివ్యదిక్సూచి!
భాషా తల్లి భుజముపై భాసిల్లే
భూషణమై కాదు..
భువనజీవన శ్వాసవై,
తరతరాల తెలుగు తలపుల తిలకమై
తేజోమయమై చిరంజీవి కావాలి!
గిడుగా! నీ వాగ్యజ్ఞ జ్వాల
యుగయుగాంతరముల యందు జ్వలించుగాక
నీ వ్యవహారికామృతధార
తెలుగు హృదయములలో నిత్యమూ ప్రవహించుగాక!
జయతు తెలుగు వాగ్వైభవం!
జయతు గిడుగు మహాతపస్సు!
జయతు జనజిహ్వా జనిత
అమరాంధ్రవాణి!
