మనసంతా కమ్ముకున్న ముసురు..
చుట్టుముట్టిన చీకట్లో
కొట్టుమిట్టాడుతున్నా…
ఓ సారి వచ్చిపోవా…!
ఏడేడు జన్మల బంధం కదా…
అస్తమానూ నీ ధ్యాసే…!
చిరుగాలి పైట తొలిగించినా…
చిరుజల్లు తనువంతా తమకంతో తడిపినా…
తీరాన అలలు పాదాలు ముద్దాడినా…
మంచు వెన్నెల ముద్ద చేసి మురిపించినా…
నీ స్మృతుల్లో విస్మృతమై నేను…
ఏ రూపంలో నువ్వున్నావోనన్న చిత్త వైకల్యంలో…
అన్నింటినీ అపురూపంగా ఆస్వాదిస్తూ…
అమాంతం అబ్బురమేదో జరుగబోతోందని భ్రమిస్తూ…
ఏదో రూపంలో ఓసారి వచ్చిపోవా…!
నువ్వు కర్కోటకుడవని నాకు తెలుసు…
విలపిస్తున్న నా ఒంటరితనం నిను కరిగించదు..
ఏ ప్రేమజంటను చూసినా…
ఏ ప్రేమకావ్యం చదివినా….
ఉప్పెనలా ముంచెత్తే దిగులు…
కయ్యంతో కలబడటానికైనా సరే…
సన్నగిల్లని ఓపికతో వేచివున్నా…
పరుషవాక్కులైనా సమ్మోహనమే….
ఓసారి వచ్చి పోవా….!
నేనో వడ్డించిన విస్తరినంటారందరు..
నీ లేమి ఎలా కాల్చేస్తుందో ఎవరికి తెలుసు…
అయినా వాగ్దానం చేసావుగా..
నేను చేసిన సేవల బాకీ చెల్లిస్తానని…
వస్తావులే….రాకేం చేస్తావు…
మరో పదేళ్ళకైనా రావలిసిందే..
నేను నిస్సత్తువతో పరుపుకు కరుచుకు పోయినప్పుడు…
నన్ను నీ కౌగిలిలోకి తీసుకోవటానికైనా వస్తావు….
మాటిచ్చావుగా….
అది తప్పవనే భరోసా నాకుంది…
నీ ప్రేమను అప్పుడైనా భట్వాడా చేస్తావన్న నమ్మకముంది….!
ఈ రోజుల్లో హైటెక్ వేగంతో నవలలు, కథలు, కవిత్వం, సమీక్షలు రాస్తున్న రచయితల్లో శ్రీమతి ఝాన్సీ కొప్పిశెట్టి ముందు వరుసలో ఉంటారు. ఇప్పటి పాఠకులకు ఝాన్సీగారు కొత్త రచయిత్రి కానీ ఆవిడ యుక్త వయసులోనే రచించిన కథలు, కవితలు వివిధ పత్రికలలో వెలువడ్డాయి. కొన్ని వ్యక్తిగత కారణాల వలన మధ్యలో వారి రచనా వ్యాసంగానికి గండి పడింది. తిరిగి గత రెండేళ్ళుగా మళ్ళీ కలం పట్టిన ఝాన్సీగారి అనేక కథలు కవితలు వివిధ పత్రికల్లో అచ్చయ్యాయి. వీరి కథలు, కవితలు ప్రతిలిపిలో అనేక బహుమతులు గెలుచుకున్నాయి. వీరు హైదరాబాదుకు చెందిన వారైనప్పటికీ ప్రస్తుత నివాసం ఆస్ట్రేలియా. తెలుగు సాహిత్యం పట్ల అమిత ప్రేమ ఉన్న ఝాన్సీగారు ఆంగ్లంలో కూడా పట్టభద్రులు. 2019లో ముద్రితమైన ‘అనాచ్చాదిత కథ’ అనే వీరి తొలినవల అసంఖ్యాక పాఠకుల అభిమానం చూరగొని అంపశయ్య నవీన్ గారి ప్రత్యేక బహుమతిని పొందినది. వీరి రెండో నవల ‘విరోధాభాస’.