[తిమ్మమ్మ మర్రిమాను గురించి పాణ్యం దత్తశర్మ గారు వ్రాసిన దీర్ఘకవితని ధారావాహికంగా అందిస్తున్నాము.]
2.
సత్యసాయి జిల్లాలో మండలమొక్కటి యున్నది
నంబులపూలకుంట పేరనయమగు పేరునుగన్నది
ఆ మండలమందు గలదు అందమైన ప్రకృతిహొయలు
కొండల కోనల వెలసిన కుగ్రామం గూటిబయలు.
దక్షిణ భారతమందున దర్శనీయమైన చెట్టు
అతిపెద్దదిగా పేరును బడసిన అద్భుతమౌ పట్టు
ఐదెకరాలకు పైనే ఆక్రమించె మర్రిమాను
శాఖలు, ఉపశాఖలుగా మించెను తన పచ్చమేను.
గిన్నీసు గ్రంథమందున చేసిరి దీనిని నమోదు
ఉరుతరవట వృక్షముగా లోకమందు సరిజోడు
సత్యనారాయణ అయ్యరు సాధించెను ఈ విజయం
మొదటనె ఆయన పొందెను అవమానం అపజయం
బెంగుళూరు నగరానికి చెందిన పాత్రికేయుడతడు
స్వేచ్ఛావృత్తిగ పొందెను స్వచ్ఛందపు సేవారతి
మర్రిమాను పై తన పరిశోధన తప్పటంచు
వ్యతిరేకముగా లేఖలు వ్రాసినారు కొంతమంది
నిరాశతో తన పేరును ‘రిగ్రెట్ అయ్యరు’ గా మార్చెను
కానీ అతని శోధన ప్రపంచమే గుర్తించెను.
3.
బుక్కపట్నమన్న ఊర వెంకటప్ప మంగమాంబ
పుణ్యదంపతులుండిరి, పూచిన తంగేడుపుట్టె
తిమ్మమ్మను బాలికగా, వారి గర్భశుక్తిముక్తాఫల
పుట్టగానె పరిమళించు పూవు వోలె భాసిల్లెను.
చక్కదనము, మంచి గుణము గంధములో పన్నీరుగ
తిమ్మమ్మను కూడి నిలిచె తిరమగు పరిమళవీచిక
మొదటినుండి మొక్కలన్న తిమ్మమ్మలో అతిమక్కువ
పచ్చదనము ఆ యమ్మకు అణువణువున వెలుగగ.
గూటిబయలు పొలిమేరల కొండల వరుసొకటున్నది
ఆ కొండల నడుమన అందమైన చదునున్నది
ఆరుబయట ఆ చదునున తిమ్మమ్మ సఖులతోడ
రకరకాల ఆటలాడి రాణించెను ప్రకృతి కన్య.
కొండలూ కొనలలో విహరించెను తిమ్మమాంబ
ప్రతి చెట్టును ప్రతి చేమను పలుకరించి పులకరించు
ఆమె హస్త స్పర్శతోనె అచటనున్న మొక్కలన్ని
సంతసమున తలుపును సమదర్శన యోగంబున
తల్లిదండ్రులందు తాను తగురీతిని గౌరవించు
పెద్దలందు ఆమె మిగుల వినయముతో మెలగుచుండు
నేస్తురాండ్రు తిమ్మమ్మకు నెయ్యము గూర్చెడు సఖులు
ప్రకృతి ఆమె దైవంబగు కొండలు కోనలు హితవగు.
యోగులు సాధువులొచ్చిన సమాదరణ తాజేయును
భక్తిగ పాదముల మ్రొక్కి ఆశీస్సులు స్వీకరించు
అమ్మణ్ణీ! నీ వినయము నిండుగు ముచ్చట గొలుపును
సౌభాగ్యము నీ సొత్తని వారలు దీవెన లిత్తురు.
ఒకనాడొక రాజయోగి బుక్కపట్నమున కొచ్చెను
సాధువులను ఆదరించు వెంకటప్ప మంగమాంబ
ఆ మహనీయుని కిచ్చిరి ఆతిథ్యము గౌరవమున
తిమ్మమ్మను చూచి యోగి దీవించగ చేరబిలిచె.
బాలిక! ఇటురా! నామము నీదేమని అడిగె యోగి
ఆయన పదములు తాకుచు ‘తిమ్మమ్మ’ని బదులు పలికె
యశస్వినీ భవ! యటంచు దీవించెను రాజయోగి
ఆంజనేయ స్వామి పేరు అందముగా అమరెననెను.
జానపదులు హనుమంతుని తిమ్మయ్యగ వ్యవహరింత్రు
వానరశ్రేష్ఠుడు మారుతి ప్రకృతి అంతర్భాగము
సాముద్రిక శాస్త్రమందు సరి లేరెవ్వరు యోగికి
బాలిక చేతిని చూచుచు భవిష్యత్తు నిటుపలికె.
అనుకూలపు దాంపత్యము అమరును చిన్నారి నీకు
భర్త ప్రేమ పుష్కలముగ పొందెదవని యోగి చెప్పె
నీ మూలంబు నీ ప్రకృతిని అద్భుతమొకటట్లు జరుగు
నీ పేరున పరిఢవిల్లు నిత్యము శాశ్యతమై ధర.
అశుభముల సూచించుట సాముద్రికులకు కూడదు
శుభములనే చెప్పవలయునన్ననిజము యోగి యెఱుగు
బాలిక జీవితమందున జరుగబోవు దుర్ఘటనను
యోగివరుడు పరిహరించె, యుక్తము ఆయన తీరది.
(ఇంకా ఉంది)
శ్రీ పాణ్యం దత్తశర్మ 1957లో కర్నూలు జిల్లా వెల్దుర్తిలో పుట్టారు. తండ్రి శతావధాని శ్రీ ప్రాణ్యం లక్ష్మీనరసింహశాస్త్రి. తల్లి శ్రీమతి లక్ష్మీనరసమ్మ. టెంత్ వరకు వెల్దుర్తి హైస్కూలు. ఇంటర్, డిగ్రీ, ఎం.ఎ. (ఇంగ్లీషు), ఎం.ఎ. (సంస్కృతం), ఎంఫిల్, పిజిడిటియి (సీఫెల్), ప్రయివేటుగానే.
దత్తశర్మ ఇంటర్మీడియట్‌ విద్యాశాఖలో లెక్చరర్‍గా, ప్రిన్సిపాల్‍గా, రీడర్‍గా, ఉపకార్యదర్శిగా సేవలందించారు. కవి, రచయిత, విమర్శకులు, గాయకులు, కాలమిస్టుగా పేరు పొందారు. వీరివి ఇంతవరకు దాదాపు 50 కథలు వివిధ పత్రికలలో ప్రచురితమై వాటిలో కొన్ని బహుమతులు, పురస్కారాలు పొందాయి.
వీరు ‘చంపకాలోచనమ్‌’ అనే ఖండకావ్యాన్ని, ‘Garland of poems’ అన్న ఆంగ్ల కవితా సంకలనాన్ని, ‘దత్త కథాలహరి’ అన్న కథా సంపుటాన్ని ప్రచురించారు. వీరి నవల ‘సాఫల్యం’ సంచిక అంతర్జాల పత్రికలో 54 వారాలు సీరియల్‌గా ప్రచురితమై, పుస్తక రూపంలో ప్రచురింపబడి అశేష పాఠకాదరణ పొందింది. 584 పేజీల బృహన్నవల ఇది. ‘అడవి తల్లి ఒడిలో’ అనే పిల్లల సైంటిఫిక్‌ ఫిక్షన్‌ నవల సంచిక డాట్‌ కామ్‌లో సీరియల్‌గా ప్రచురించబడింది.
వీరికి ఎ.జి రంజని సంస్థ కవి సామ్రాట్‌ విశ్వనాథ పురస్కారాన్ని, ‘తెలంగాణ పాయిటిక్‌ ఫోరమ్‌’ వారు వీరికి ‘Poet of Profundity’ అన్న బిరుదును, బెనారస్‌ హిందూ విశ్వవిద్యాలయంవారు వీరి సిద్ధాంత గ్రంథానికి అవార్డును, సి.పి. బ్రౌన్‌ సమితి, బెంగుళూరు వారు వీరికి ‘NTR స్మారక శతకరత్న’ అవార్డును బహూకరించారు.
ఇద్దరు పిల్లలు. ప్రహ్లాద్, ప్రణవి. కోడలు ప్రత్యూష, అల్లుడు ఆశిష్. అర్ధాంగి హిరణ్మయి. సాహితీ వ్యాసంగంలో రచయితకు వెన్నుదన్నుగా ఉన్న గురుతుల్యులు, ప్రముఖ రచయిత వాణిశ్రీ గారు. వీరు – తమ సోదరి అవధానం లక్ష్మీదేవమ్మ గారు, మేనమామ శ్రీ కె. సీతారామశాస్త్రి గార్లకు ఋణగ్రస్థులు.