[శ్రీ గొర్రెపాటి శ్రీను రచించిన ‘అమృతమూర్తులు’ అనే కవితని పాఠకులకి అందిస్తున్నాము.]
నవమాసాలు మోసి జన్మనిచ్చి
ఆప్యాయతకు నిలువెత్తు రూపమై
ప్రేమ స్వరూపమై
ఇలలో దేవతలా కాపాడుతుంది అమ్మ!
తన ఊపిరి ఉన్నంతవరకు
బిడ్డల అభ్యున్నతే ధ్యేయంగా
కృషి చేసే మహోన్నతుడు నాన్న!
ప్రేమానురాగాలకు అర్థం అమ్మానాన్నలు!
నీకే చిరు కష్టం ఎదురైనా తల్లడిల్లుతూ..
నువ్వు కోలుకోవాలని
తిరిగి శక్తివంతుడవై
సమాజంలో మంచి పేరు ప్రఖ్యాతులు తెచ్చుకుని
ఉన్నతంగా ఎదగాలని
సదా తపించే నీ హితకారులు అమ్మానాన్నలు!
నీ చేయి పట్టుకొని నడిపించిన
వారి హృదయాలు వృద్దాప్యంలో కష్ట పెట్టకు!
తమ ఆకలిదప్పికలు సైతం మర్చిపోయి..
నీ అవసరాలు తీర్చిన వారి మంచితనాన్ని గుర్తుంచుకుని
పెద్దవాళ్ళు పట్ల వినయవిధేయతలతో మసలుకో!
దైవాన్ని దర్శించడమంటే
ప్రత్యక్షంగా తల్లిదండ్రులకు సేవ చేయడమే అని తెలుసుకో!
గొర్రెపాటి శ్రీను అనే కలం పేరుతో ప్రసిద్ధులైన రచయిత జి.నాగ మోహన్ కుమార్ శర్మ డిప్లమా ఇన్ మెకానికల్ ఇంజనీరింగ్ (బి.టెక్) చదివారు. వీరి తల్లిదండ్రులు శాంతకుమారి, కీ.శే.బ్రమరాచార్యులు.
ఓ ప్రైవేటు సంస్థలో మేనేజర్‍గా పని చేస్తున్న రచయిత హైదరాబాద్ బాలనగర్ వాస్తవ్యులు.
‘వెన్నెల కిరణాలు’ (కవితాసంపుటి-2019), ‘ప్రియ సమీరాలు’ (కథాసంపుటి-2021) వెలువరించారు. త్వరలో ‘ప్రణయ దృశ్యకావ్యం’ అనే కవితాసంపుటి రాబోతోంది.