[శ్రీమతి శైలజామిత్ర రచించిన ‘భారతమాత ప్రశ్న’ అనే దీర్ఘ కవితని అందిస్తున్నాము. ఇది 4వ భాగం.]
~
మతాల గోడలు
ఉదయపు మొదటి కిరణం
దేవాలయం గోపురాన్ని తాకింది.
అదే కిరణం
మసీదు గుంబజాన్ని ముద్దాడింది.
అదే వెలుగు
చర్చి శిలువపై నిలిచింది.
అదే తేజస్సు
గురుద్వారా గుమ్మాన్ని అలంకరించింది.
సూర్యుడికి
ప్రార్థనల భాష తెలియదు.
వెలుగుకు
మతం తెలియదు.
గాలికి
సరిహద్దులు లేవు.
వానకు
ద్వేషం రాదు.
అయితే..
దేవుని పేరుతో
మనిషి ఎందుకు
మనిషిని కోల్పోతున్నాడు?
గుడిలో వెలిగించిన దీపమే
ఇంటి బయట
ద్వేషాన్ని ఎందుకు వెలిగిస్తోంది?
ప్రార్థనలో జోడించిన చేతులే
యుద్ధంలో
పిడికిలిగా ఎందుకు మారుతున్నాయి?
ఖురాన్
ప్రేమను పలికింది.
గీత
ధర్మాన్ని నేర్పింది.
బైబిల్
క్షమను బోధించింది.
గురుగ్రంథ్
సేవను చూపించింది.
పుస్తకాలు
మనిషిని దేవుని దగ్గరకు తీసుకెళ్లాయి.
రాజకీయాలు
దేవుణ్ణి
మనిషి కిందకు దించాయి.
దేవాలయం
ఎప్పుడూ యుద్ధం ప్రకటించలేదు.
మసీదు
ఎప్పుడూ ద్వేషాన్ని కోరలేదు.
చర్చి
ఎప్పుడూ రక్తాన్ని అడగలేదు.
దేవుడు
ఒకే ఆకాశాన్ని ఇచ్చాడు.
మనిషి
అందులో
వేల గోడలు కట్టుకున్నాడు.
నేను భారతమాతను..
నా గుండెలో
వేల దేవాలయాలున్నాయి.
నా రక్తనాళాల్లో
ఒకే మానవత్వం ప్రవహిస్తోంది.
మీరు దేవుణ్ణి వెతికారు.
దొరికిందేమిటి?
ఒక గోడ.
ఒక అనుమానం.
ఒక ద్వేషం.
దేవుడు చిరునవ్వు నవ్వాడు..
“నన్ను వెతకడం ఆపు..
నీ పక్కనున్న మనిషిని ప్రేమించు.”
“దేవుడిని చేరే దారి ఒక్కటే..
అది మనిషి హృదయం గుండా వెళ్తుంది.”
“గుడి గోడలు కాదు..
మనసు తలుపులు తెరిస్తే దేవుడు కనిపిస్తాడు.”.
(సశేషం)
శైలజా మిత్ర 1966, జనవరి 15 వ తారీఖున చిన్నగొట్టిగల్లు గ్రామం, చిత్తూరు జిల్లాలో జన్మించారు. వీరు ఎం.ఏ. తెలుగు (ఉస్మానియా విశ్వవిద్యాలయం), ఆంగ్లంలో ఎం.ఏ. (వెంకటేశ్వర విశ్వవిద్యాలయం) తిరుపతిలో, జర్నలిజం (రచన జర్నలిజం కాలేజీ, హైదరాబాద్లో పీజీ డిప్లొమా చేసారు. నేటినిజం అనే డైలీ పత్రికలో స్టాఫ్ రిపోర్టర్ గా దాదాపు 10 సంవత్సరాలు; అల్ ఇండియా రేడియో, ఎఫ్.ఎం.లో డీఈవోగా 3 సంవత్సరాలు, వెలుగు పత్రికలో అడ్మినిస్ట్రేటర్గా ఐదు సంవత్సరాలు పనిచేసారు. ప్రస్తుతం విమల సాహితి వెబ్ పత్రిక ప్రధాన సంపాదకులుగా వ్యవహరిస్తున్నారు.
వీరి సాహితీ జీవితం 1995లో ప్రారంభమైంది. ఇప్పటివరకు 11 కవితా సంపుటాలు, 4 కథా సంపుటాలు, 4 నవలలు, 12 అనువాదాలు రచించారు. 775 పుస్తక సమీక్షలు, 29 భక్తి–సామాజిక వ్యాసాలు, 11 ఇంటర్వ్యూలు, భావతరంగిణిలో 26 సాహితీ లేఖలు ప్రచురించారు. సాహిత్య ప్రస్థానంలో దాదాపు యాభైకి పైగా అవార్డులు అందుకున్న శైలజా మిత్రగారికి ఇటీవల పొట్టి శ్రీరాములు తెలుగు విశ్వవిద్యాలయం ఉత్తమ రచయితగా ‘కీర్తి పురస్కారం’ ప్రదానం చేసింది. ఉత్తమ విమర్శకురాలుగా అమృతలత గారి ‘అపురూప పురస్కారం’ పొందారు. వీరు రచించిన ‘రాతిచిగుళ్ళు’ కవితాసంపుటికి ‘ఉమ్మడిశెట్టి’ మరియు ‘శ్రీశ్రీ’ ఉత్తమగ్రంథ పురస్కారాలు లభించాయి. ఆల్ ఇండియా లాంగ్వేజ్ అండ్ లిటరరీ కాన్ఫరెన్స్ వారు ప్రతిష్ఠాత్మక ‘సాహిత్యశ్రీ’ బిరుదు ప్రదానం చేశారు.