[శ్రీమతి శైలజామిత్ర రచించిన ‘భారతమాత ప్రశ్న’ అనే దీర్ఘ కవితని అందిస్తున్నాము. ఇది 6వ భాగం.]
~
స్త్రీ కన్నీటి సాక్ష్యం
నేనే..
నీ తొలి శ్వాసను
నా గుండెలో దాచుకున్న తల్లి.
నీ తొలి అడుగును
నా వేళ్లు పట్టి నడిపించిన చేయి.
నీ తొలి మాటలో
‘అమ్మ’గా వికసించిన జీవితం.
అయినా..
నా పేరును
బలహీనతగా రాశావు.
నా మౌనాన్ని
భయంగా అర్థం చేసుకున్నావు.
నన్ను
దేవతగా పూజించావు.
అదే చేతులతో
దాసిగా నిలబెట్టావు.
పండుగలలో
కన్యాపూజ చేశావు.
రోజువారీ జీవితంలో
ఆమె స్వప్నాలను
మట్టిలో కలిపేశావు.
నా నవ్వును
ఇంటి గోడల మధ్య బంధించావు.
నా చదువుకు
సంప్రదాయం అనే సంకెళ్లు వేశావు.
నా అడుగులకు
అనుమతి అనే గుమ్మం కట్టావు.
నా స్వరాన్ని
‘సహనం’ పేరుతో
నిశ్శబ్దం చేశావు.
ఒక్కసారి ఆలోచించు..
నిన్ను మోసిన గర్భమే
ఈ దేశాన్ని మోస్తోంది.
నిన్ను పాలించిన చేతులే
ఈ నాగరికతను పెంచాయి.
ప్రతి వీరుడి వెనుక
ఒక తల్లి ఉంది.
ప్రతి మహాకవి వెనుక
ఒక స్త్రీ ప్రేరణ ఉంది.
ప్రతి విప్లవం వెనుక
ఒక మహిళ నిశ్శబ్ద త్యాగం ఉంది.
నన్ను కాపాడాలని అనకు..
నా గౌరవాన్ని
కాపాడడం నేర్చుకో.
నాకు స్వేచ్ఛ
దానం చేయకు..
అది నా జన్మహక్కు.
నేను భారతమాతను..
నాకు భర్త అక్కరలేదు
ఈ భూమిపై పుట్టిన ప్రతి బిడ్డ
నా హృదయ స్పందనే.
ఆమె కన్నీటి చుక్క
భూమిపై పడిన ప్రతిసారి..
నా గుండెలో
ఒక పర్వతం కూలిపోతుంది.
నా బిడ్డ
భయపడే దేశం..
ఎప్పటికీ
మహా దేశం కాలేదు.
“స్త్రీని గౌరవించిన ఇల్లు..
దేవాలయం కాకపోయినా పవిత్రమే.”
“ఆమె కన్నీరు బలహీనత కాదు..
ఒక నాగరికతకు చివరి హెచ్చరిక.”
(సశేషం)
శైలజా మిత్ర 1966, జనవరి 15 వ తారీఖున చిన్నగొట్టిగల్లు గ్రామం, చిత్తూరు జిల్లాలో జన్మించారు. వీరు ఎం.ఏ. తెలుగు (ఉస్మానియా విశ్వవిద్యాలయం), ఆంగ్లంలో ఎం.ఏ. (వెంకటేశ్వర విశ్వవిద్యాలయం) తిరుపతిలో, జర్నలిజం (రచన జర్నలిజం కాలేజీ, హైదరాబాద్లో పీజీ డిప్లొమా చేసారు. నేటినిజం అనే డైలీ పత్రికలో స్టాఫ్ రిపోర్టర్ గా దాదాపు 10 సంవత్సరాలు; అల్ ఇండియా రేడియో, ఎఫ్.ఎం.లో డీఈవోగా 3 సంవత్సరాలు, వెలుగు పత్రికలో అడ్మినిస్ట్రేటర్గా ఐదు సంవత్సరాలు పనిచేసారు. ప్రస్తుతం విమల సాహితి వెబ్ పత్రిక ప్రధాన సంపాదకులుగా వ్యవహరిస్తున్నారు.
వీరి సాహితీ జీవితం 1995లో ప్రారంభమైంది. ఇప్పటివరకు 11 కవితా సంపుటాలు, 4 కథా సంపుటాలు, 4 నవలలు, 12 అనువాదాలు రచించారు. 775 పుస్తక సమీక్షలు, 29 భక్తి–సామాజిక వ్యాసాలు, 11 ఇంటర్వ్యూలు, భావతరంగిణిలో 26 సాహితీ లేఖలు ప్రచురించారు. సాహిత్య ప్రస్థానంలో దాదాపు యాభైకి పైగా అవార్డులు అందుకున్న శైలజా మిత్రగారికి ఇటీవల పొట్టి శ్రీరాములు తెలుగు విశ్వవిద్యాలయం ఉత్తమ రచయితగా ‘కీర్తి పురస్కారం’ ప్రదానం చేసింది. ఉత్తమ విమర్శకురాలుగా అమృతలత గారి ‘అపురూప పురస్కారం’ పొందారు. వీరు రచించిన ‘రాతిచిగుళ్ళు’ కవితాసంపుటికి ‘ఉమ్మడిశెట్టి’ మరియు ‘శ్రీశ్రీ’ ఉత్తమగ్రంథ పురస్కారాలు లభించాయి. ఆల్ ఇండియా లాంగ్వేజ్ అండ్ లిటరరీ కాన్ఫరెన్స్ వారు ప్రతిష్ఠాత్మక ‘సాహిత్యశ్రీ’ బిరుదు ప్రదానం చేశారు.