[శ్రీమతి శైలజామిత్ర రచించిన ‘భారతమాత ప్రశ్న’ అనే దీర్ఘ కవితని అందిస్తున్నాము. ఇది 8వ భాగం.]
~
రాజ్యాంగం ఏడుస్తోంది
నన్ను..
తోలు అట్టల మధ్య
బంధించిన పుస్తకమని అనుకోకు.
నేను..
వేలాది త్యాగాల
చివరి సంతకం.
అనేక కన్నీటి చుక్కలతో
రాసిన ప్రతిజ్ఞ.
బానిస సంకెళ్లను
తెంచిన స్వేచ్ఛా శ్వాస.
నా ప్రతి అక్షరం..
ఒక అమరుని రక్తపు చుక్క.
నా ప్రతి పుట..
ఒక తల్లి నిరీక్షించిన ఉదయం.
నేను రాసింది
చట్టాలు మాత్రమే కాదు..
మనిషిని
మనిషిగా నిలబెట్టే విలువలు.
నేను చెప్పాను..
అందరూ సమానమని.
కానీ..
మీరు
సమానత్వానికే
కొలతలు పెట్టారు.
నేను చెప్పాను..
స్వేచ్ఛ
ప్రతి మనిషి జన్మహక్కు అని.
మీరు..
స్వేచ్ఛను
భయంతో కొలిచారు.
నేను చెప్పాను..
న్యాయం
కళ్లకు గంతలు కట్టుకుంటుందని.
కానీ..
మీరు దానికి
రంగులద్దారు.
అధికారపు మెట్లపై
నా అక్షరాలు
ధూళిలో కలుస్తుంటే..
ప్రజల మౌనం
నన్ను ఇంకా ఎక్కువగా ఏడిపించింది.
నన్ను మార్చడానికి
మీకు హక్కు ఉంది.
కానీ..
నన్ను మరిచిపోయే
హక్కు లేదు.
నన్ను చదవడం
పరీక్ష కోసం కాదు..
దేశాన్ని అర్థం చేసుకోవడం కోసం.
ఒకప్పుడు..
నన్ను చేతిలో పట్టుకొని
స్వప్నాలు చూశారు.
ఇప్పుడు..
నన్ను అలమారాలో పెట్టి
స్వార్థాలను చదువుతున్నారు.
నేను భారతమాత గుండెల్లో
కొట్టుకునే ధర్మం.
నా శ్వాస ఆగితే..
ప్రజాస్వామ్యం
కేవలం పదంగా మిగులుతుంది.
అందుకే..
నన్ను కాపాడకండి.
నా ఆత్మను
మీ జీవితాల్లో నిలబెట్టండి.
“రాజ్యాంగం కాగితం కాదు..
ప్రజల గౌరవానికి శాశ్వత ప్రమాణం.”
“చట్టాన్ని చదివినవాడు విద్యావంతుడు..
చట్టాన్ని జీవించిన వాడే భారతీయుడు.”
(సశేషం)
శైలజా మిత్ర 1966, జనవరి 15 వ తారీఖున చిన్నగొట్టిగల్లు గ్రామం, చిత్తూరు జిల్లాలో జన్మించారు. వీరు ఎం.ఏ. తెలుగు (ఉస్మానియా విశ్వవిద్యాలయం), ఆంగ్లంలో ఎం.ఏ. (వెంకటేశ్వర విశ్వవిద్యాలయం) తిరుపతిలో, జర్నలిజం (రచన జర్నలిజం కాలేజీ, హైదరాబాద్‌లో పీజీ డిప్లొమా చేసారు. నేటినిజం అనే డైలీ పత్రికలో స్టాఫ్ రిపోర్టర్ గా దాదాపు 10 సంవత్సరాలు; అల్ ఇండియా రేడియో, ఎఫ్.ఎం.లో డీఈవోగా 3 సంవత్సరాలు, వెలుగు పత్రికలో అడ్మినిస్ట్రేటర్‌గా ఐదు సంవత్సరాలు పనిచేసారు. ప్రస్తుతం విమల సాహితి వెబ్ పత్రిక ప్రధాన సంపాదకులుగా వ్యవహరిస్తున్నారు.
వీరి సాహితీ జీవితం 1995లో ప్రారంభమైంది. ఇప్పటివరకు 11 కవితా సంపుటాలు, 4 కథా సంపుటాలు, 4 నవలలు, 12 అనువాదాలు రచించారు. 775 పుస్తక సమీక్షలు, 29 భక్తి–సామాజిక వ్యాసాలు, 11 ఇంటర్వ్యూలు, భావతరంగిణిలో 26 సాహితీ లేఖలు ప్రచురించారు. సాహిత్య ప్రస్థానంలో దాదాపు యాభైకి పైగా అవార్డులు అందుకున్న శైలజా మిత్రగారికి ఇటీవల పొట్టి శ్రీరాములు తెలుగు విశ్వవిద్యాలయం ఉత్తమ రచయితగా ‘కీర్తి పురస్కారం’ ప్రదానం చేసింది. ఉత్తమ విమర్శకురాలుగా అమృతలత గారి ‘అపురూప పురస్కారం’ పొందారు. వీరు రచించిన ‘రాతిచిగుళ్ళు’ కవితాసంపుటికి ‘ఉమ్మడిశెట్టి’ మరియు ‘శ్రీశ్రీ’ ఉత్తమగ్రంథ పురస్కారాలు లభించాయి. ఆల్ ఇండియా లాంగ్వేజ్ అండ్ లిటరరీ కాన్ఫరెన్స్ వారు ప్రతిష్ఠాత్మక ‘సాహిత్యశ్రీ’ బిరుదు ప్రదానం చేశారు.