[శ్రీ గొర్రెపాటి శ్రీను రచించిన ‘హృదయరాగం’ అనే కవితని పాఠకులకి అందిస్తున్నాము.]
తూర్పు దిక్కుకి పసిడి వర్ణాన్ని అద్దుతూ
బాలభానుడు ఉదయిస్తున్న శుభసమయం..
సన్నగా కురుస్తున్న మంచు బిందువులు
మల్లెమొగ్గలపై చేరి అందంగా మెరుస్తుంటాయి!
చిరుగాలి తాకిడికే తట్టుకోలేక
పూలమొక్కలన్నీ వయ్యారంగా
ఊగుతూ మురిపిస్తుంటాయి!
కోవెల నుండి శ్రావ్యంగా వినిపిస్తున్న
గుడిగంటల నాదాలు
ఓంకారాల తన్మయాలు
తొలిపొద్దుల మేల్కొలుపు రాగాల సుస్వరాలు
పరవశింపజేస్తుంటాయి!
పక్షుల కిలకిలారావాల సందళ్ళు
ఎదలకు ఉల్లాసాలని పరిచయం చేస్తుండగా
ప్రకృతి అందంగా శోభిల్లుతూ అలరిస్తుంటుంది!
కలల లోకాన అప్పటి వరకు
హాయిగా విహరించిన హృదయాలు
తొలి వేకువల ఆనందాలని తిలకిస్తాయి
ఉత్సాహంగా మరో కొత్త రోజుకు
స్వాగతం పలుకుతూ
విజయాలని అందుకోవాలని తలుస్తూ
పనుల్లో లీనమవుతుంది అశేష మానవాళి!
ఉదయమంటే..
మనల్ని మనం సరికొత్తగా
ఆవిష్కరించుకునే అవకాశ ప్రారంభం!
గొర్రెపాటి శ్రీను అనే కలం పేరుతో ప్రసిద్ధులైన రచయిత జి.నాగ మోహన్ కుమార్ శర్మ డిప్లమా ఇన్ మెకానికల్ ఇంజనీరింగ్ (బి.టెక్) చదివారు. వీరి తల్లిదండ్రులు శాంతకుమారి, కీ.శే.బ్రమరాచార్యులు.
ఓ ప్రైవేటు సంస్థలో డిప్యూటీ మేనేజర్‍గా పని చేస్తున్న రచయిత హైదరాబాద్ బాలనగర్ వాస్తవ్యులు.
‘వెన్నెల కిరణాలు’ (కవితాసంపుటి-2019), ‘ప్రియ సమీరాలు’ (కథాసంపుటి-2021) వెలువరించారు. త్వరలో ‘ప్రణయ దృశ్యకావ్యం’ అనే కవితాసంపుటి రాబోతోంది.