[శ్రీ రఘు శేషభట్టార్ రచించిన ‘కంపన’ అనే కవితని పాఠకులకు అందిస్తున్నాము.]
అంతరిక్ష నీలాల నుంచి ఎగిరి ఒక పక్షి
ఇంటి శిఖరం మీద వాలినట్టు
వాడలా తుంపరలా వచ్చిపోయాక
ఇల్లు ఇల్లంతా అల్లుకున్నాయి నెమరు చెమ్మలు
ఇన్నాళ్లు వ్యాపకాలే వాడి దేవతలైనట్టు
తల్లిదండ్రులు ఉప దేవతలై మిగిలినట్టు
ముందు ముందు పలకరింపులు కూడా బరువెక్కి పెగులుతాయని
రుసరుసలాడి ఉంటాను
తీరా వాడి చెప్పుల చప్పుడు విన్నాక
చిటపటలన్నీ ప్రహరీ మీద పిట్టల్లా తుర్రుమంటాయి
వాడి రాకలో ఒక కువకువ
నా ప్రాణమయ కోశం మీద నాజూకు ఈకలా
స్థిరపడుతుంది
స్తబ్ధత మెత్తబడి ఉడికిన గింజలా చితుకుతుంది
మిలమిల పొదిగిన కళ్ళు అలవాటుగా
ప్రామాణిక ప్రేమల్ని రువ్వినప్పుడు –
ఎన్నో సుగంధాలు పోసి నేసిన గుండె కదా!
ఏ చిన్న కంపనకైనా పడవలాగే ఊగుతుంది
రఘు శేషభట్టర్ గారి స్వస్థలం ఖమ్మం. 18 నవంబర్ 1970వ తేదీన జన్మించిన రఘు ప్రస్తుతం హైదరాబాద్ లోని ఒక బహుళ జాతి సంస్థలో డిప్యూటీ జనరల్ మేనేజర్ (లీగల్)గా బాధ్యతలు నిర్వహిస్తున్నారు. ఒక స్వాప్నికుడి శ్వేత సంతకం, సూర్యుడు పొడిచిన రాత్రి, నిద్రపోని మానవ కోయిల, లిపి తడిసిన తరుణం, మోహధూపం, నేను కల వెన్నెల, అసంకల్పిత పద్యం, అనల్పం, దిశాంతర స్వప్నం (9 కవితా సంపుటాలు), సౌరభం (వ్యాస సంపుటి) ప్రచురిచమయ్యాయి. ప్రస్తుతం హైదరబాద్ నేరేడ్‌మెట్ లోని రామకృష్ణాపురంలో నివాసం. ఫోన్స్: 9676144904 & 9603264732