చతుర్వింశతి సంఖ్యాయాం త్రేతాయాం రఘునందనః।
హర్మానుష్యో భవితా రామో దశరథాత్మజః ॥
24వ త్రేతాయుగంలో హరి మానవ రూపం ధరిస్తాడు. దశరథుడి కుమారుడిగా జన్మిస్తాడు. ఈ సంఘటనను ఆరంభంలో చిన్నగా, ఆ పై అతి పెద్దగా సంబరాలతో పండుగగా జరుపుకోవాలి.
నీటిలో, పాలలో, నెయ్యిలో నానిన ధాన్యాలతో తయారుచేసిన వంటకాలను నైవేద్యంగా అర్పించాలి. బంధుమిత్రులను, బ్రాహ్మణులను గౌరవించాలి. రాముడి భార్య సీతను చిత్తశుద్ధితో పూజించాలి. తొమ్మిదవ రోజున పిండి, తేనెలతో కలిపిన పిండి పదార్థాలతో భోజనాలు పెట్టాలి. కరిశినిని పూజించాలి. పదవ రోజున వరి అన్నంతో పలు రకాల వంటలు చేసి స్నేహితులు, బంధువులు, బ్రాహ్మణులకు భుజింపచేయాలి. పదవ రోజున శక్తి కొలదీ పిండి వంటలు చేసి బంధు మిత్ర సహితంగా భుజించాలి. చక్కని సంగీతం వినాలి. పవిత్ర వస్తువులను స్పృశించాలి. హరిని ధ్యానించాలి.
కృష్ణపక్షం 14వ రోజున ఉపవాసం ఉండాలి. శుభ్రంగా స్నానం చేసి శివుడిని అర్చించాలి. శివలింగానికి అభిషేకం చేయాలి. సుగంధ ద్రవ్యాలు పూయాలి. పూలమాలలు వేయాలి. ఎర్రటి దుస్తులు అర్పించాలి. పలు రకాల పిండి పదార్థాలు నివేదించాలి. జాగరణ చేయాలి. శివుడి స్తోత్రాలు వినాలి. శివధర్మాలను స్మరించాలి.
శివార్చనలో సగం ఉడికిన బార్లీ, తీపి పదార్థాలతో తయారైన ఖాద్య ద్రవ్యాలను నైవేద్యంగ అర్పించాలి. శివుడిని పూజించటం వల్ల గణాలపై ఆధిపత్యం సిద్ధిస్తుంది. రుద్రలోక నివాసం లభిస్తుంది.
ఫాల్గుణ మాసం శుక్లపక్షంలో జరుపుకోవాల్సిన పండగల విధి విధానాలను చెప్తాను జాగ్రత్తగా విను.
ఉపవాసం ఆచరించి, శుభ్రంగా స్నానం చేసి, అలంకరించుకుని, సాయం సమయంలో మంచులో దీపాలను ఉంచాలి.
దేవతలను, పిత్రుదేవతలను అర్చించాలి.
తరువాతి రోజు ఇళ్ళను అందంగా అలంకరించాలి. మందిరాలను ధాన్యం, మాలలతో అలంకరించి చిత్తశుద్ధితో పూజించాలి. సీతాదేవిని పూలమాలలతో, సుగంధ ద్రవ్యాలతో అర్చించాలి. ఆటలు, పాటలు, నృత్యాలతో అత్యంత ఆనందాలతో పండుగను జరుపుకోవాలి.
మరుసటి రోజు తనని తాను అలంకరించుకుని, పవిత్ర వస్తువులను స్పృశించి ప్రత్యేకంగా పండుగను జరుపుకోవాలి.
ఆ రోజు తన మీద ఆధారపడి ఉన్నవారికి, బ్రాహ్మణులకు బహుమతులు ఇవ్వాలి. వారు ఇచ్చిన బహుమతులను స్వీకరించాలి. వీరికి కాక బంధువులను, కళాకారులను కూడా సత్కారం చేసి బహుమతులు ఇవ్వాలి.
ఎవరికైతే మాదకద్రవ్యాలు, పానీయాలు సేవించే అలవాటు ఉంటుందో వారు ఆనందంగా మదిరను సేవించాలి. బ్రాహ్మణులు ప్రత్యేకమైన పానీయాలు సేవించాలి. గర్భగుడిని సుగంధ ద్రవ్యాలతో నింపేయాలి.
ఆ రోజు ఎలాంటి దూషణలు, తిరస్కారాలు ఉండకూడదు. అందరూ సంతోషంగా ఉండాలి. కలసి ఉండే మహిళలు, అందమైన వస్త్రాలతో, సుగంధం నిండిన శరీరాలతో, నిలువెల్లా ఆభరణాలతో, మగవారితో కలిసి ఆటలు ఆడాలి. పాటలు పాడాలి. పౌర్ణమి రోజు ‘ఆర్యమా’ను పూజించాలి.
రాత్రంతా ఆటలు, పాటలు, వాయిద్యాల మ్రోతల నడుమ జాగరణ చేయాలి. ఇలా కృష్ణపక్షం ఐదవ రోజు వరకూ గడపాలి. నాట్యం చేసిన వారిని, గాయకులను, వాయిద్యకారులను సముచితంగా సత్కరించాలి.
అయిదు రోజుల పాటు ‘పర్వత’ అన్న మూలికతో తయారు చేసిన ఆహారాన్ని సేవించాలి. ఈ అయిదు రోజులు మహిళలు సర్వావయవ సర్వాభరణ భూషితులయి సంతోషంగా ఉండాలి.
ఆ అయిదవ రోజు నుంచి కశ్మీరుకు ‘ఋతుస్రావం’ ఆరంభమవుతుంది. ఆ రోజు నుంచి కశ్మీరు ప్రజలు పెద్ద ఎత్తున పూజలు ఆరంభించాలి.
(ఇంకా ఉంది)
కస్తూరి మురళీకృష్ణ ప్రసిద్ధ తెలుగు రచయిత. విస్తృతమైన రచనా సంవిధానాల్లో, విస్తారమైన సాహిత్యాన్ని అందిస్తున్నారు. కథ, నవల, వ్యాసాలు మొదలైన ప్రక్రియల్లో, చారిత్రిక కల్పన, కాల్పనిక, సాహిత్యవిమర్శ, వైజ్ఞానిక, వ్యక్తిత్వ వికాస, హారర్, క్రైమ్ తదితర పలు విభాగాలలో రచనలు చేస్తున్నారు. కాల్పనిక, కాల్పనికేతర విభాగాల్లో ఆయన రచించిన రచనలకు పాఠకుల ఆదరణ లభిస్తోంది.
కథాసంపుటాలు: 4 x 5, ఆ అరగంట చాలు, భారతీయ ప్రేమ కథామాలిక, ఉజ్జ్వల భారత మహోజ్జ్వల గాథలు, సైన్స్ ఫిక్షన్ కథలు, జాతక కథలు, థ్రిల్లింగ్ చిల్లింగ్ కథలు, ప్రపంచ ప్రేమ కథామాలిక,
నవలలు: ముస్సోలిని, పునఃసృష్టికి పురిటి నొప్పులు, సౌశీల్య ద్రౌపది, రోషనార, శ్రీకృష్ణదేవరాయలు, అసిధార, అంతర్మథనం, మర్మయోగం, అంతర్యాగం, ఆపరేషన్ బద్ర్, జగమే మారినదీ..,
అనువాద రచనలు: కల్హణ కశ్మీర రాజతరంగిణి కథలు, జోనరాజ రాజతరంగిణి, నీలమత పురాణం, నిజాం పాలన చివరి రోజులు,
వ్యాస సంపుటాలు: తీవ్రవాదం, శైశవ గీతి, అక్షరాంజలి, మనం మరువకూడని మహాయుద్ధం 1857, ప్రాచీన విజ్ఞానం, భారతీయ తత్త్వచింతన, భారతీయ వ్యక్తిత్వ వికాసం, రియల్ స్టోరీస్, క్రైమ్ స్టోరీస్-1, మన ప్రధానమంత్రులు, మన తెలుగు ముఖ్యమంత్రులు,
బయోగ్రఫీలు: మైకేల్ జాన్సన్, సంగీత సరస్వతి లతామంగేష్కర్,
సినిమా పుస్తకాలు: పాడుతా తీయగా, కమర్షియల్ క్లాసిక్స్, నవల నుంచి సినిమాకు,
సంపాదకత్వం/సంకలనాలు: తెలుగు కథల్లో గాంధీ మహాత్ముడు, కులం కథ, రైలు కథలు, క్రీడా కథ, దేశభక్తి కథలు, రామకథాసుధ
పురస్కారాలు/బహుమతులు: 1995లో ఆంధ్రప్రభ ‘దీపావళి’ నవలల పోటీలో ‘అంతర్యాగం‘ నవలకు ద్వితీయ బహుమతి. 1999 లో ఆంధ్రభూమి సస్పెన్స్ నవలల పోటీలో ‘ఆపరేషన్ బద్ర్ ‘ నవలకు ప్రత్యేక బహుమతి లభించాయి. 2017 సంవత్సరానికి తెలుగు విశ్వవిద్యాలయం వారి కీర్తి పురస్కారం గ్రహీత.
~
కల్హణ కశ్మీర రాజతరంగిణి కథలు కన్నడంలోకి; థ్రిల్లింగ్ చిల్లింగ్ కథలు ఒడియాలోకి, మరాఠీలోకి అనువాదమయ్యాయి. ‘పాడుగా తీయగా’ హిందీలోకి అనువాదమవుతోంది.

